مواد مستوى سادس ( السنة الثالثة - الفصل الدراسي الأول) عام 1437هـ -1438 هـ

السلام عليكم ورحمة الله وبركاته

أسعد الله أيامكم بكل خير 

قبل لا أبدأ أتكلم عن مواد المستوى السادس أحب أبشركم إن هالمستوى بترتاحون فيه إن شاء الله  =) أعتبره مستوى راحة بعد خامس واستعداد لسابع ، يعني شدوا حيلكم فيه وارفعوا معدلاتكم

( بنزل لكم إن شاء الله كل التخليصات والأشياء المهمة عندي، بس أبي أرتبها لكم 

واكتبها بالوورد لأن كلها ورقية)

بسم الله نبدأ :

نبذة عن المقرر : تتكلم المادة عن القواعد الأساسية لتشغيل وعمل الأجهزة شائعة الاستعمال مثل : أجهزة الطرد المركزي ، Absorption Atomic (AAS(Spectrophotometry ،Electrophoresis، اجهزة الفصل الكروماتوجرافي والتقنيات المهمة مثل   GC و HPLC، و استخلاص وتنقية البروتينات والأحماض النووية.

النظري: المادة جميلة وممتعة ومو طويلة كانت تقريباً 8 أجهزة، لو ركزتي بالمحاضرة كويس وحفظتي أول بأول راح تستمتعين فيها. الدكتورة تحب اللي يسأل، وتحب الشخص المُطلع على آخر أخبار العلوم، يعني ممكن فجأة تسألكم عن شيء جديد اكتشفوه بالمحاضرة  ، وتشوف هل أنتم مُهتمين بآخر الأخبار أو لا. بس طبعاً ما عليه درجات ولا شيء. بالنسبة لأسئلتها : تجيب صح وخطأ ( دقيق ) مع تصحيح الخطأ – فراغات ( بدون word bank) – رسمات عليها بيانات تعبينها، ومره جابت لنا رسمة احنا نرسمها ( بس سهلة مو صعبة ) .

أعضاء هيئة التدريس (عملي) :

أ.هند الشويمان  ،أ.هدى الخطيب ، أ.نورة الكبيسي

العملي : تكرار النظري ، مافيه شغل أبد، بس يورونكم الأجهزة وكل مرة يطلبون مننا نسوي زي التقرير عن تعريف الجهاز واستخداماته وطريقة عمله. الأجهزة اللي مو موجودة عندنا ياخذونا للمختبر المركزي نشوفها هناك. يعني العملي مره سهل .

المرفقات :

- اختصارات الأجهزة وبعض المصطلحات ( مهمة مرة ) :

http://www.4shared.com/office/T-bNLngCba/___.html

نبذة عن المقرر : المادة تتكلم عن الكائنات الحية الدقيقة بشكل عام ، وتتعمق بالعمليات الفسيولوجية وكيفية استغلالها لإنتاج منتجات ذات قيمة اقتصادية على الصعيد الصناعي .

النظري: عدد المحاضرات يعتبر كثير شوي ( كثير شوي يعني مو بالشكل المهول =)) ) ، لكن المادة العلمية مو صعبة. آخر المحاضرات هي اللي يبيلكم تركزون عليها زين لأنه بيكون عندكم عدد من المواد الأولية والميكروبات والنواتج النهائية واستخداماتها ، وعشان ما تلخبطون ركزوا كويس وبحط لكم جدول يسّهل عليكم . أخذنا المادة عن د.عبير ، حاولوا قد ما تقدرون ما تغيبون ولا محاضرة ، لأنها وقت الشرح تفصّل في  بعض النقاط ، واللي تقوله يكون مره مهم . بالنسبة لأسئلتها تجيب كل شيء ، وتحب المقالي، ووقت ما تحلين أكتبي كل شيء وبالتفصيل على قولتها : " ما تبخليش بالإجابات " ما تمانع إنك تكتبين من فهمك لكن بشرط تغطين كل النقاط . تجيب تعاريف وتعداد وفراغات وصح وخطأ وكل شيء =) .

عضو هيئة التدريس (عملي) :

 أ.هويدا حبودل

صبرت علينا صبر بهالمقرر عظيم لأن العملي لهالمادة يبيله متابعة، يعني نادراً تجربة تطلع نتائجها بنفس وقلت المعمل. التجارب تأخذ أحياناً شهر، عشان كذا لا تغلطون غلطتنا وتضيعون تعب الأستاذة، لأنها تتعب على ما توفر لنا المواد خاصة وإنه فيه نفط وتربة نفطية .... إلخ. ذكروا بعض دايم وحطوا تنبيه عشان ما تنسون. التجارب ممتعة بس احنا الله يصلحنا ضيعناها علينا . بالنسبة للفاينل كان كله مقالي فذاكروا كويس، والرسمات مهمة بعد. بالنسبة لأسلوب ا.هويدا تحب البنت اللي تنتبه معاها وغالباً بنص الشرح تسأل سؤال يحتاج عصف ذهني وتشوف طريقتك باستنتاج الإجابة ، طبعاً ضروري اللاب كوت والجوالات تكون بالشنطة وصامت والشعر ترفعينه والعلك والأكل والشرب ما يدخل اللاب ( هذي بكل لاب طبعاً و ا.هويدا ما تمشيها لو شافتها ^^ )

المرفقات :

- الملف فيه جداول مهمة (جامعة تقريباً المواد الأولية والميكروبات والمنتجات)  :


http://www.4shared.com/office/mfx-Cc8Pce/____.html

نبذة عن المقرر : المادة تتكلم عن التقنيات المتبعة في جمع العينات وطرق نقلها وحفظها و تشخيص الأمراض بطرق مختلفة منها : ( استخدام الأحماض النووية في التشخيص، الطرق المخبرية الجزيئية ) وأمثلة على  أمراض ميكروبية مثل الأمراض الفيروسية والبكتيرية والفطرية والطفيلية.

النظري:  الدكتورة  ماراح تمسك المادة هالترم عشان كذا للأسف ما أقدر أفيدكم.

أعضاء هيئة التدريس (عملي) : 

أ.نورة الكبيسي ، أ.الجوهرة العبّاد

العملي كمياً ومعلوماتياً كثير بس مُمتع. والشيء اللي ساعدنا بعد إنهم كانوا يسوون لنا كويزات ويسألون كل معمل عن المعمل السابق. برضوا الأسئلة – غالباً أسئلة أ.نورة - ما تجيكم مباشرة أو نصية ، عشان كذا بهالمادة حاولوا قد ما تقدرون ما تحفظون الكلام كثر ما تفهمونه . وإذا شرحت أ.نورة حاولوا تفهمون وتكتبون معاها لأنه اللي تركز عليه هو المهم ولأنه يهمها الفهم أكثر من الحفظ . التجارب ممتعة مره وسهلة – لأن معظمها مكرر-  ، وبالنسبة للتقارير ركزوا عليها لأنهم يدققون فيها .

نبذة عن المقرر : تتكلم المادة عن المياه كأوساط بيئية للكائنات الحية الدقيقة و توزيع الكائنات فيها و العوامل المؤثرة على نمو وتوزيع الكائنات الحية الدقيقة . وتتكلم عن الفلورا الميكروبية لمياه الصرف الصحي وتلوثها وطرق تنقيتها .

النظري : بالنسبة للمنهج نكتب معاها وكان فيه فيديو مدته تقريباً 20 دقيقة نشوفه ونلخصه ونسلم التلخيص بوقت المحاضرة وجانا منه بالميد . بالنسبة للأسئلة تتغير كل مرة =) بس بشكل مجمل تحب الإجابات المختصرة ما تحب الكلام الكثير وممكن إذا تفلسفتي تنقصين فانتبهوا ! تحب الخرائط الذهنية فحطوا ببالكم ممكن يجيكم سؤال عنها وممكن ما يكون سؤال مباشر يعني تقول مثلا تكلمي عن عملية الإثراء الغذائي باختصار – ركزوا على الإثراء الغذائي مهم – وقتها تجاوبون بخريطة ذهنية فيها أهم النقاط الرئيسية ولا تشرحون. اللي بتاخذ أي مادة مع د.أمل أول مره بتتعب بالبداية شوي عشان تفهم طريقتها بس بعدين بتتعود عليها وبتحس إنها سهلة، فلا تشيلون هم ^^ . ولا تنسون العروض اللي تنزلها لكم بالموقع ( غالباً تكون صور) جانا منها بالفاينل.

أعضاء هيئة التدريس (عملي) :

 أ.نورة الكبيسي ، أ.الجوهرة العبّاد

المادة تجاربها حلوة وسهلة بس زي ما قلت لكم من قبل انتبهوا للتقارير لأنهم يدققون فيها كثير. ونصيحة وقت الشرح ركزوا معاهم واكتبوا النتائج والتفسير وبكذا ماراح تتعبون وقت كتابة التقارير وبتكون كاملة عندكم . واحرصوا على تصوير النتائج بشكل واضح.

المرفقات :

- جدول للميكروبات المسببة للأمراض وخصائصها
 (راجعوه مع الدكتورة لأنها كل ترم تزيد شيء أو تحذف شيء)  :


http://www.4shared.com/office/WMQ7JQvSba/___online.html

نبذة عن المقرر : تتكلم المادة عن المادة الوراثية في الأحياء الدقيقة و التركيب البنائي والكيميائي لها و التعبير الجيني والشفرة الوراثية و طرق انتقال المادة الوراثية ومن هذي الطرق : الاقتران - النقل البكتيري- النقل بواسطة الفاج وتتكلم عن الطفرات الوراثية وطرق الإصلاح

النظري : للأمانة الملزمة كلامها شوي متداخل ، عشان كذا ضروري تركزون مع شرح الدكتورة وتكتبون معاها ، هالشيء بيسهل عليكم بشكل جداً كبير. المادة جميلة وممتعة بس زي ما قلت لكم ركزوا مع الدكتورة . بالنسبة للأسئلة غالباً بيجيكم صح وخطأ واختياري لكن ممكن يجيكم مقالي، إحنا الميد الثاني كان كله مقالي -بس سهل- يعني ما تجيب شيء مابين السطور في المقالي. وفيه عندكم رسمات ركزوا عليها واكتبوا معاها وهي تشرحها هالشيء بيسهل عليكم مره .

أعضاء هيئة التدريس (عملي) : 

 ا.هويدا حبودل ،  ا.ريهام الأحمدي

بالنسبة لاستاذة هويدا ما يحتاج أعيد كيف طريقتها ^^ أما بالنسبة لاستاذة ريهام ضروري تكونون معاها طول ماهي تشرح ، يعني ردوا عليها وتفاعلوا معاها. ركزوا وقت الشرح على الأجهزة زين، وجربوا كذا مره لين تتقنون الشغل عليها خاصة جهاز الـ  Gel Electrophoresis  و الـ  Nanodrop   لأنه 80% بيجيكم بالفاينل، وركزوا على رسمة البلازميد مره مهمة وفيه جدول للـ PCR ركزوا عليه وإعرفوا كويس طريقة عمل الجهاز وقت الشرح عليه.

نبذة عن المقرر : المادة تتكلم عن تراكيب الاحياء الدقيقة التالية: العلبة - التراكيب الخيطية والزوائد - الغلاف الخلوي ويشمل الجدار الخلوي، الغشاء الخارجي الغشاء السيتوبلازمي - المورثات – الكروموسوم – البلازميدات - الجراثيم –الريبوسومات – الأغشية الحيوية - الكمون في الأحياء الدقيقة.

النظري : المادة تكرار للبكتيريا اللهم بالانجليزي ، يعني أبد مو صعبة . بالنسبة للأسئلة أغلبها صح وخطأ واختياري ويجي كم سؤال مقالي. بالفاينل جتنا محاضرة البلازميد كلها مقالي =) فركزوا وإنتوا تذاكرون .

أعضاء هيئة التدريس (عملي) : 

أ.البندري العرجاني – أ.ريهام الأحمدي

ا.البندري وترتنا بالبداية وقالت ترى بجيب لكم من الشرح وتلخبطنا وصار شيء عربي وشيء انجليزي ، بس بالأخير كانت الأسئلة سهلة الحمدلله . بهالمادة ماراح تشتغلون شيئ غير صبغ جرام والكبسولات والحركة والكشف عن الطحالب والفطريات . يعني كلها أشياء مكررة وسهلة وفرصة لكم تتدربون على (إتقان) العمل. 

المرفقات :

- هذا الملف مهم، فيه جداول بتسهل عليكم كثير (تصنيف الجراثيم، محاضرة البلازميد....) : 

http://www.4shared.com/office/WMQ7JQvSba/___online.html

- الملفين بيسهلون عليكم اختبارات العملي ( هي مو صعبة بس يسهلها عليكم أكثر وقت الفاينل): 

 *اختبارات التفرقة بين مجموعة الق

http://www.4shared.com/office/zbMgTgoUba/____.html

*الاحتمالي والتأكيدي والتكميلي

http://www.4shared.com/office/tOzqtJG3ba/___online.html

نبذة عن المقرر : المادة تتمحور حول التقنيات المستخدمة في عمل الملصقات العلمية و كيفية عرض التقارير العلمية المكتوبة. والتركيز على الناحية الشفهية ، وتطوير المقترح البحثي ، وتنظيم المحتوى ، وقبول ا لحضور و إلقاء البحث ،وتنمية المهارات الأساسية في كتابة التقارير العلمية وكيفية استخدامها والرجوع إلى المصادر العلمية، وكيفية كتابة مشروع البحث – مهارات استخدام قواعد البيانات والإنترنت

المادة ساعة وحدة بس كمية الشغل فيها عظيمة =) . لكن على قد ماهو كرف على قد ما تستمعون بالنتائج النهائية لتعبكم . عرفنا كيف ننقد ورقة علمية ، وكيف نكتب مقترح بحثي ، وكيف نوثق المراجع العلمية بطرق متعددة ، وكيف نعرض مقترحاتنا البحثية بثلاث دقايق بس . يعني اكتسبنا مهارات جداً مهمة ومفيدة لنا . طبعاً هالمادة تعتمد بشكل كبير جداً على أسلوب عضو هيئة التدريس، عشان كذا لو بيمسكها أحد غير د.أسماء ممكن تلقون اختلاف.

الملفات المهمة : 

- بهالمادة الدكتورة ما قصرت بالمراجع ، حتى لو ما درستكم بتسفيدون منها .. 

*أنماط توثيق المراجع العلمية 

http://fac.ksu.edu.sa/asmalsaleh/blog/140329

بالنهاية شُكراً لكل وحدة ساهمت في هذه التدوينة : 
هديل الدرسوني