الأربعاء، 8 أبريل، 2015

التحويل الخارجي ( من جامعة لجامعة أخرى ) . .






بسم الله الرحمن الرحيم
في هالتدوينة بحاول ان شاء الله اني اتطرق لجميع جوانب التحويل ومتطلباته وكل شيء يتعلق فيه
قبل لا ابدا بحكي عن التحويل .. التحويل عندك اما يكون تحويل داخلي : ( تغيير التخصص في نفس الجامعة )
او تحويل خارجي : ( تغيير الجامعة )
.. .. .. ..
بداية بحكي عن سالفة تحويلي
حولت من جامعة الأميرة نورة لجامعة الملك سعود لأنهم قفلو لنا مسارات القسم
(الاحياء كان يحتوي على 3 مسارات : عام – دقيق – جزيئي)
والتقفيل جا قبل اختيار المسار حقنا بترم, ما تتخيلون قد ايش التحطيم اللي جانا ووش كثر تعبنا عشان نخليهم
يرجعون لنا الاقسام لكن ( الخيرة فيما اختاره الله )
المهم فتح التحويل الخارجي على نهاية السنة تقريبا كنت متأزمة نفسيا لأقصى درجة , استخرت وقدمت اوراقي والحمدلله انقبلت بسعود
صح انه تحطمت بالبداية لانه فيه مادتين بالتحضيري ما عادلوها لي فاضطريت ادرس ترم كامل على مادتين وكلهم بس ساعتين !! وكنت اداوم 4 ايام بالاسبوع :"" بس صبرنا والحمدلله
اللي باقوله هنا انا درست بنوره 3 سنوات لكن هذا ما يمنع اني اسلك طريق ثاني حتى لو كان طويل في سبيل تحقيق هدفي , عشان كذا لا يهمك كم درست ولا كم باقي المهم انت وش تبي توصله ؟؟ وكلام الناس سكر اذانك عنه وامشي
وبالاخير اللي ربي يختاره هو الخير
.. .. .. ..
ندخل الحين بالحاجات المهمه عشان التحويل الخارجي والمتطلبات وكل شي :
اذا تبي تقدم على تحويل خارجي لازم تعرف الجامعة اللي تبي تحول لها متى تفتح التحويل الخارجي عندها
مثلا انت تدرس بجامعة الامام وتبي تحول لجامعة الملك سعود لازم تعرف ( جامعه الملك سعود متى تفتح التحويل الخارجي تبعها ) وغالبا الجامعات تعلن قبل بفترة ويعطون وقت كافي للأوراق والاجراءات
- بعد ما تعرف التاريخ تروح تشوف المتطلبات الخاصة بالتقديم للتحويل في الجامعة اللي تبي تحول
مثلا متطلبات التحويل في جامعة الملك سعود كل مره ينزلونها من جديد , اللي كانت على وقت تحويلي حتحصلونها هنا بالرابط :
طبعا انتبه انتبه انتبه .. تقديم الطلب ابدا ما يعني قبولك عشان كذا لا تطلب اخلاء طرف ابدا ابدا ابدا (سحب ملف) إلا بعد ما يجيك اشعار القبول ويطلبون منك تسلمهم إخلاء الطرف
لانه في حال طلبك لسحب الملف وما انقبلت في الجامعه المحول لها راح تضطر انك تقدم كطالب جديد وبكذا ما حتتعادل لك ولا مادة وبتعيد من اول وجديد فإنتبه !!!
.. .. .. .. 
الحين بحاول اشرح لكم النقاط اللي تحتاج لتنبيه من المتطلبات اللي هم حاطينها
( غالبا تكون هالمتطلبات نفسها في كل الجامعات )
2- سجلك الأكاديمي أكد لهم انهم يختمون على كل واحد فيهم , ونصيحة مني أطلب منهم 4 سجلات اكاديمية لانه حتحاجه بعدين
4- غالبا حيكون لك سبب مقنع او مبرر مقنع للتحويل فأنت اكتب سبب تحويلك للجامعة
5- هذي النقطة أحب انبه عليها , لازم اختبارك حق القياس ما يكون مر عليها اكثر من 5 سنوات لانه وقتها حتعتبر النتيجة ملغية ولازم تعيد الاختبار ثاني , ولو كانت نسبتك القياس والتحصيلي منخفضة انصحك انك تعيدهم من البداية عشان ترتفع نسبة قبولك للجامعة اللي تبي
7- لا تقدم لهم اي ورقة اصل , كلها خليها صور طبق الأصل ماعدا السجل الأكاديمي طبعا لانه ماراح يحق لك تطالب بالاوراق مره ثانية
8- هذي زي مانبهت فوق ’ لما يجيك اشعار القبول وقتها تقدر تروح تسحب ملفك بس انتبه تسحب ملفك وتجلس تتمطط لين يروح عليك الوقت , لانه قبولك ما يعني انهم راح يستنونك لين تجي , لهم وقت ويقفلون
10 - التعريف من جهة عمل ولي الأمر تكون فقط للطلاب اللي خارج مدينة الرياض
(الأوراق هذي تروح انت بنفسك لعمادة القبول والتسجيل تقدمها لهم )
.. .. .. .. 
بتكلم الحين عن إخلاء الطرف لانه يمكن بعضكم ما يعرف وشو هو (نفس حالتي اول) =))
إخلاء الطرف هو :  ورقة لازم يكون فيها تقريبا 4 او 5 توقيعات واختام ماني ذاكرة بالضبط , يكون كل ختم وتوقيع من جهة معينة في الجامعة , من الجهات اللي اذكرها كانت المكتبة المركزية ومكتبة كليتك وتوقيع من 3 اماكن ثانية بس ناسية وشي والله ’ المهم انه هذا الاخلاء تاخذه من جامعتك بعد كذا تروح لحقين الملفات وتطلب سحب ملف , هو المفروض يسالونك ليه ومن هالحكي بس جامعة نورة ما طقت لي خبر هههههههههه المهم راح ياخذون منك بطاقتك الجامعية ويوقعونك على ورقة انك سحبت الملف بإرادتك وحاجات زي كذا وبعدين يعطونك ملفك
(هذا كله بعد القبول )
بعد كذا يا أما انك ترسل الأوراق المطلوبة بعد قبولك عن طريق البريد او تروح تقدمها بنفسك لهم ( انا عني رحت لهم بنفسي =)) لانه ملف وكذا فأحس ما ارتحت اني ارسله لهم)
بكذا اجراءات تحويلك للجامعة تمت , في بداية السنة لازم تروح تستخرج بطاقة جامعية لك
.. .. .. .. 
الحين بيبدأ مشوار ثاني .. :" اللي هو ( معادلة المواد اللي درستها )
من شروط معادلة المواد :
1- انك تكون ناجح بالمادة ( مو مهم بأي تقدير لانها بسجلك الاكاديمي الجديد حيحطونها فقط انها مُجتازة ولا راح تدخل في معدلك ابدا) << فرصة كويسة للي مخبصين =))
2- ان يتطابق وصف المادة اللي درستها مع وصف المادة اللي تبي تعادلها , يعني شلون ؟ يعني يكون تقريبا 80%  من محتوى المادتين متطابق
3- ان يكون عدد الساعات المادة اللي درستها مساوي لعدد ساعات المادة اللي تبي تدرسها ( وما يمنع يكون أكثر لكن مو أقل لأنه لو كان مثلا درست أحياء عامة 3 ساعات , والمادة اللي تبي تعادلها هي عبارة عن أحياء عامة 4 ساعات ما راح يعادلونها بينما لو كان العكس عادي  )
.. .. .. .. 
نجي الحين لمتطلبات المعادلة :
1- سجلك الاكاديمي الأصل , (هذي النسخة الرابعة اللي قلتلك بتحتاجها) ويمكن تحتاج أكثر من نسخة للمعادلة (بوضح ليه بعد ما اخلص )
2- وصف المادة مختوم من القسم اللي تتبعه المادة
3- ورقة المعادلة اللي تاخذها من شؤون الطلاب (شؤون الطالبات) "لكل مادة ورقة معادلة"

الحين خليني اوضح لكم طريقة المعادلة .. بضرب مثال فيني .. ويحكون فيه 4 حالات للمواد اللي تبي تعادلها
انا طالبة أحياء تابعه لكلية العلوم ,
(الأول: مادة خارج الكلية ) درست مادة سلم 101 مثلا , وأبي اعادلها , لازم اروح لكلية التربية قسم الثقافة الإسلامية وأرفع طلب من هناك , في حال تطابق وصف المادة وعدد الساعات راح أعطيهم 3 أشياء
1- سجلي الأكاديمي 2- ورقة المعادلة 3- وصف المقرر
ورقة المعادلة لازم يوقع عليها الشخص المسؤول عن المعادلة عشان يرفعونها لعمادة القبول والتسجيل عشان تنفذها على النظام وتنلغي من الخطة
(الثاني : مادة داخل الكلية ولكن تخصص مختلف ) زي ما ذكرت انا طالبة أحياء ولكني درست مادة كيمياء عامة مثلا , وأبي أعادلها , لازم أروح لقسم الكيمياء العامة
 هنا لأن القسم في نفس كليتي فراح ارفع طلب المعادلة لكل المواد اللي داخل الكلية , يعني قسم الكيمياء راح اوريهم سجلي الاكاديمي ( عشان يتأكدون من اجتيازي للمادة ) + وصف المقرر يطابقونه بعدين راح يوقعون لي على ورقة المعادلة ويرجعون لي اوراقي ( وهذا حيصير بكل المواد اللي داخل الكلية زي ماقلت )
(الثالث: مادة داخل الكلية ونفس التخصص ولكن مسار مختلف ) : نفس الشي أنا طالبة أحياء – مسار أحياء دقيقة – ولكني درست مادة من مسار الحيوان العام , مثلا مادة علم الحيوان , لازم اروح لقسم مسار الحيوان العام واقدم طلب معادلة من هناك
الاجراءات راح تكون مطابقة تماما لإجراءات معادلة الحالة الثانية
(الرابع : مادة داخل الكلية ونفس التخصص ونفس المسار ) مثلا درست مادة من نفس مساري – الاحياء الدقيقة- ولنفرض انها نبات , هالمره اروح لقسم مساري واقدم طلب هناك وبرضو نفس اجراءات الحالة الثانية والثالثة

الحين الحمدلله خلصت معاك اوراق المعادلات موقعه من كل الاقسام بالموافقة , وين تروح ؟
تروح لشؤون الطلاب\ الطالبات , وهم عليهم انهم يقدمون خطاب لعمادة القبول والتسجيل مرفق معاها ( اوراق المعادلات حقتك + سجلك الأكاديمي )
تسلمهم اوراقك وبعدها تتابع البوابة الالكترونية حقتك , المواد اللي عادلوها لك راح تظهر لك في سجلك الاكاديمي ولكن زي ما ذكرت بدون اي تقدير ولا تحسب في معدلك
 .. .. .. 
( طبعا الله يعينك عالنفسيات اللي بتقابلها وعلى بعض الاشخاص اللي بيعقدون لك حاجات سهلة , وبتحصل ناس ودك تحب روسهم من تعاملهم الزين , انت بس اصبر اصبر )
انا عني للحين ما خلصت معادلة موادي بسبب اشخاص معقدينها علي :"" يعني خلتني اروح وارجع وربي بدون مبالغة 4 الى 5 مرات على الفاضي :"" لكن مانقول الا الصبر الصبر
صح وفيه حاجة ترى مو لازم تقدمهم كلهم مع بعض يعني اذا فيه ناس عقدوها عليك , وتحس انهم بيحوسونك حوس
قدم اوراقك وتفرغ لهم بعدين , وارجع قدم ثاني =)))
.. .. .. .. 
في آخر شي بقول كذا غلط طحت فيه وكم نصيحة لكم :
1- لا تستحي من السؤال , عادي صير انسان بثر اهم شي لا تكتفي بإجابة شخص واحد , لانه فيه اشخاص بس يبون يفتكون وماعندهم لا ذمة ولاضمير , فأنت امشي واسأل واقرأ وابحث واحفر الارض حفر
2- لازم تعرف انه محد بيفيدك كثر نفسك عشان كذا لا تعتمد لا على فلان ولا على علنتان , خلص شغلك بنفسك
3- تحويلك لجامعة اخرى ما يلزمك تحول لنفس تخصصك , (هذه النقطة لا زلت مو متأكدة منها للان للأسف , لكن الارجح قالو لي لازم تحولين لنفس التخصص وبعدها بترم تطلبن تغيير التخصص ) , بس نستفيد من تجاربنا ونفيد ^^
4- لو كان باقي لك مواد بالتحضيري لا تغلط نفس غلطتي وتاخذهم بلحالهم خاصة لو كانت مادتين , لانه تقدر تاخذ من مواد التخصص حقتك , شلون وانت بالتحضيري ؟ انت اساسا انقبلت بالتخصص عشان كذا ما تعتبر تحضيري , بالنسبة لي ضيعت ترم كامل عالفاضي بس لازم الواحد يغلط عشان يتعلم 
5- بتقابل ناس تحسسك انها تتفضل عليك باللي انت جالس تسويه , ماعليك منهم اصبر انت لين تخلص امورك
6- اخيراً لا تقول مستحيل ادخل الا بواسطة ولا تعتمد ابد على درجاتك وجهدك , انتبه :"" اعتمد اولا واخيرا على الله سبحانه وتعالى

بكذا اكون خلصت ^^ لو فيه اي سؤال ارحب فيه على التويتر
@madaensaleh
او على الآسك :

ask.fm/madaensaleh




هناك تعليق واحد:

  1. السلام عليكم لو سمحت ينفع اذا حولت لسعود لتخصص غير اللي انا ادرس فيه دحين

    ردحذف