تحليل الجلوكوز ( كيح 101 ) - كيمياء حيوية

السلام عليكم ورحمة الله وبركاته 

عملية تحلل الجولكوز مركباتها كثيرة وتلخبط شوي حاولت اربط بينهم بقصة والحمدلله 

احسها سهلتها شوي 
+ اللي يحب يحفظ عن طريق الجداول ويحس انها افضل لها هذا ملف فيه عملية تحلل الجلوكوز على شكل جدول : 
https://www.4shared.com/office/Sxzuc-Y8ce/___.html

بالنسبة للقصة حبيت اكتبها يمكن تفيد احد وتساعده ^^ 

اسم المرحلة بالوردي 

اسم الإنزيم 

بسم الله الرحمن الرحيم 

خلونا نفرض انه هذا الجلوكوز انه جلوكوز صغير عمره حول 12 سنة 

بعد كم سنة هالجلوكوز الصغير كبر وصار ناضج جنسياً وجسدياً 

وتحول من جلوكوز الى جلوكوز 6 - فوسفات (حاولو تربطو ال_ 6 بالنضج الجنسي ) 

طبعا هالتحول صار عن طريق إنزيم اسمه ( هيكسوكينيز) -> برضو الاسم قريب من 6

بس لأن الجلوكوز لساته مو قوي كان يحتاج لوجود الماغنيسيوم أو المنجنيز يساعدونه (تنبيه: هذه ليست معلومة علمية فقط للربط) 

عملية النضج هنا تحتاج لطاقة ATP

(الحين هو ناضج جنسيا وجسديا لكنه ماوصل للعمر اللي يخليه يتزوج ) =)) 

بعد كم سنة كبر الجلوكوز 6 - فوسفات وصار اسمه فركتوز 6 - فوسفات 

عن طريق انزيم فوسفوجلوكوزايسوميريز لكنه مازال ضعيف عشان كذا لا زال يحتاج للماغنيسيوم او المنجنيز  

الحين صار جاهز انه يتزوج =) لما تزوج 

تحول الفركتوز 6 - فوسفات الى 6,1 ثنائي الفوسفات (فيه رقمين يعني صارو اثنين هو وزوجته ) 

عن طريق إنزيم فوسفوفركتوكينيز هنا هو بس راح يحتاج للماغنيسيوم (صار اقوى ) واستهلك طاقة ايضا في الزواج ATP 

( استهلك طاقة في النضج واستهلك طاقة في الزواج اللي هي مرحلة 1 و 3 )

قرر الزوجين انهم يروحون لمحل (ألدو) *ببين لكم ليه اخترت هالمحل 

في المحل الزوج شاف وحدة عجبته هناك وراح لها والزوجة شافته 

فتهاوشو مع بعض وانفصلو ( انشطار مركب الفركتوز6,1 ثنائي الفوسفات ) 

عن طريق إنزيم الألدوليز (عرفتو ليه اخترت محل الدو ؟ ) =)) 

نتج مركبين 

الزوج واللي عجبته كونو ثنائي اسمه (ثنائي هيدروكسي اسيتون فوسفات ) و الزوجة (جليسر ألدهيد 3-فوسفات ) 

نجي لمرحلة ( تحول السكريات الثلاثية الفوسفاتية ) : 

بعد فترة البنت اللي سرقت الزوج وكونو ثنائي هيدروكسي اسيتون فوسفات انفصلت عن الزوج وسحبت عليه ( يستاهل =))) ) 

هو حاول معاها بس مافيه فايدة ( اربطو المحاولة بالانزيم ) 

ترايوز فوسفات أيزوميراز (Try ; حاول 

وصار الزوج وحداني زي ما خلى زوجته المسكينة ( جليسر ألدهيد 3- فوسفات ) 

هنا انتحت المرحلة الاولى من حياة الزوج والزوجة(5 تفاعلات الاولى)

 , وبعد خطأهم قررو انهم يصيرون أفضل وأحسن وما يكررون غلطهم مره ثانية  وكل واحد راح بسبيله ولكن كلهم صار لهم نفس الشي ( عشان كذا من هنا راح نبدأ نضرب النواتج بـ 2 لانه تكون عندي جزيئين من الجليسر ألدهيد 3 - فوسفات ) 

اللي بحكيه عن الزوج نفسه صار مع الزوجه 

طور من نفسه وقابل له وحده وارتبطو سوى 

فتحول من شخص وحداني جليسر ألدهيد 3-فوسفات إلى ثنائي 3,1 فوسفوجليسيريت 

* لاحظو التطور الى الجليسيريت 

عن طريق إنزيم جليسر الدهيد 3 - فوسفات ديهيدروجينيز 

طبعاً لانه بعد عملية الانفصال صار ضعيف فإحتاج لعامل مساعد اللي هو NAD 

للأسف حظه نحيس , ماكملو سوى وانفصلوا 

تحول من 3,1 ثنائي فوسفوجليسيريت إلى 3 فوسفوجليسريت

عن طريق إنزيم فوسفوجليسيريد كينيز 

(انتج طاقة ATP ) تذكرو اننا نضرب ب 2 لانه اللي يصير للزوج يصير للزوج 

المسكين بعد كل اللي مره فيه صار ينقص وزنه 

فتحول من 3 فوسفوجليسيريت إلى 2- فوسفوجليسيريت 

عن طريق إنزيم فوسفوجليسروميوتيز (ولأنه بدا يضعف صار يحتاج للماغنيسيوم ) 

( مو معناها ان المركب ضعيف ترى بس عشان القصة ) 

من كثر ما تعب الزوج ماصار يهتم بصحته وصارت الموية تنزال من جسمه 

فعند إزالة جزيء ماء من 2- فوسفوجليسيريت تحول الى شيء مختلف تماما 

( فوسفوإينول بيروفيت ) 

عن طريق إنزيم الإينوليز -> قريب من اسم المركب الناتج 

ولانه زاد ضعفه صار يحتاج للماغنيسيوم او المنجنيز 

آخر شي ونهاية القصة 

راح يجي إنزيم اسمه البيروفيت كاينيز وينقل مجموعه فوسفات من مركب الفوسفواينول بيروفيت ل ADP عشان ينتج طاقة ATP وبيروفيت 

وهنا الحاجة حتزيد في النهاية ويكون بحاجة البوتاسيوم + المنجنيز او الماغنيسيوم 

(تفاعل غير عكسي ) 

مايقدر يرجع يعيد الزمن ويصحح اخطاءه 

في النهاية لازم تعرفون انه هناك 3 تفاعلات غير عكسية منظمة 

1 و 3 و 10 وارجعو للملزمة ثاني ^^

=))) 

حابه انبه عن كذا شغله 

1- ما ذكرت هنا كل شيء حاولت اختصر قد ما اقدر لانه الهدف هنا الربط بين المراحل 

2- ماذكرت الطاقات الناتجةوالمستهلكة كلها ارجعو للملزمة ثاني 

3- مو شرط ابداً ان هالطريقة تنفع معاك لانه يختلف طبعا من شخص لشخص 

4- سالفة ان المركب ضعيف والحاجات هذي زي ما ذكرت وااكد هي حاجة غير علمية ولكن فقط لتساعدنا على الربط 

5- إن اصبت فمن الله وحده وان اخطأت فمن نفسي ومن الشيطان 

بالتوفيق للجميع وما نبي إلا دعواتكم  ^^ 3>