بسم الله الرحمن
الرحيم ..
في هذه التدوينة
بتكلم إن شاء الله عن التدريب الخارجي، وبحاول قد ما أقدر أغطي معظم الجوانب.
بدايةً ماهو التدريب
الخارجي؟
هو عبارة عن برنامج
تدريبي مُقدم من جامعة الملك سعود يعمل على تدريب الطلاب والطالبات في جهات مختلفة
خارج المملكة العربية السعودية. والبرنامج في نسخته الثالثة لهذه السنة في كلية
العلوم.
آلية الانضمام
لبرنامج التدريب الخارجي:
تم اعتماد آلية
الترشيح للانضمام، وتعتمد الآلية – من ملاحظتي- على المعدل بشكل كبير، ومن ثم
اللغة.
تجربتي:
في منتصف الفصل
الدراسي الثاني تواصلت معاي وكيلة القسم د.منى الوهيبي، وبلغتني إنه تم ترشيحي
للتدريب الخارجي، وإنها السنة الثانية للبرنامج، ولكن لم يتم التأكيد على التاريخ
أو الجهة حتى الآن. حيث أن لكل قسم جهة
مختلفة ووقت مختلف (ولكنه متقارب).
في نهاية شهر رجب تم
عقد اجتماع مع جميع المُرشحين من جميع الأقسام وإدارة الكلية، شرحوا لنا فيه فكرة
التدريب، والإجراءات اللازمة، والمتطلبات كاملة، والجهات المحددة للتدريب،
والتواريخ، واستعرضوا تجارب الطلاب والطالبات في النسخة الأولى من البرنامج.
البرنامج التدريبي لقسمنا كان في ميلانو –
إيطاليا- وأذكر الكيمياء الحيوية كانوا في لندن -بريطانيا- والفيزياء إن ماخاب ظني
كان ألمانيا بس مدري وين بالضبط، وفيه تخصص كانوا باليونان، بالإضافة إلى إن جهات
التدريب لقسم الطلاب تختلف عن قسم الطالبات، ومدة التدريب كانت 14 يوم تقريباً. بعدها
بدأنا بتجهيز الأوراق الرسمية من جواز وفيزا وغيره.
بالنسبة للتذاكر
والسكن د.منى كانت حاجزتهم ومرتبتهم لنا الله يسعدها. لكن لابُد تعرفون إن الكلية تتكفل
فقط بتذكرة الطالب والسكن وتكاليف استخراج الفيزا بدون المرافق. وهذي من الأشياء
اللي اقترحت على الكلية بالتقرير تغييرها. بحيث تتكفل الكلية – في حال استطاعتها-
بتكاليف المرافق للطالبات؛ لأنه يندر وجود من يسمح للطالبة بالخروج بدون مرافق، ومن
الممكن ألا تملك الطالبة القدرة على التكفل بالمصاريف، فتروح عليها تجربة تستحق
خوضها.
تدريبنا زي ما ذكرت
كان في ميلانو (إيطاليا) في مختبرات مؤسسة دون كارلو جنوكتشي للرعاية الصحية.
سكنا في مكان جداً قريب من المختبر، تقريباً 15 إلى 20 دقيقة مشي. الوضع في
المدينة والحي اللي ساكنين فيه كان جداً آمن ومريح، والمشرفة د.منى كانت جداً
متعاونة ودايم معانا ومختارة لنا غرف جنب بعض (وكلمة حق تنقال: لولا الله ثم هي
ماكانت التجربة بتكون بهذا النجاح والجمال) وكنا نروح للمختبر سوى الصباح على
الساعة 8 تقريباً ونرجع تقريباً 3 أو 3 ونص.
الأبحاث اللي كانت
تركز عليها مختبرات المؤسسة تتمحور حول الزهايمر ومرض التوحد والتصلب اللويحي،
وكانوا مركزين على الجانب الجيني والوراثي من هالناحية ووقتها كانوا رافعين ورقة
علمية للنشر واطلعونا عليها. وفي الأيام الأولى أخذونا في جولة حول المكان، وكان
فيه متحف للشخص اللي أقام هذا المستشفى وهو عبارة عن جندي أسس المستشفى لكل الناس
اللي عندهم إصابات من الحرب ولمرضى الزهايمر والتصلب اللويحي والتوحد.
بالنسبة لطاقم العمل
بالمختبر كان جداً لطيف ومتعاون، وكانوا حريصين إننا نشتغل، ونتدرب على التقنيات. وكنا
كل كم يوم نناقش ورقة علمية منشورة لهم، بحيث يشرحونها لنا ، بعدين نقرأها في
السكن واليوم الثاني لو عندنا أي سؤال أو أي شيء مو واضح نبلغهم. بالنسبة لمستوى
اللغة الإنجليزية كان متفاوت، البعض كانت لغته ممتازة والبعض كانت متوسطة وفيهم كم
شخص ماكانوا يتكلمون إنجليزي أبداً.
بالنسبة للتقنيات اللي
تدربنا عليها كانت كالتالي:
Flow Cytometry, DNA Sequencing, SPP-PCR
Analysis, Cell Count and Detection of Long-non-coding mRNA
وكان مطلوب مننا تقرير نجهزه عشان نرفعه لما
ننتهي من التدريب، فالأفضل تخلون عندكم مسودة تكتبون فيها الأشياء اللي تعلمتوها، ولا
تنسون توثقون بالصور، هذي الطريقة بتسهل عليكم الموضوع لما تبدأون بكتابة التقرير
بشكل كامل لما تخلصون التدريب. بالإضافة إلى ملف تقييم للبرنامج، بتكتبون فيه
النقاط الإيجابية والسلبية. هذي كلها راح تُطلب منكم بعد الانتهاء والعودة من
التدريب.
هذا كل ما يتعلق
بالمختبرتقريباً، أما بالنسبة للدولة بشكل عام واجهنا صعوبة شوي في التواصل مع
الشعب، لأن أكثر من 90% يرفضون يتكلمون لغة غير الإيطالية. وعلى وقتنا كان الجو مو
بارد =)). لكن كان فيه جزر قريبة، جوها لطيف جداً زي كومو. وبالنسبة للمحلات كانت
تفتح متأخر وتسكر بدري، فما كان يمديني أطلع لأماكن سياحية إلا في الويكند أو تكون
طلعة سريعة بعد التدريب لمكان قريب.
المواصلات جداً سهلة
هناك وما تعبنا فيها أبداً، والأماكن واضحة ما تضيع.
وهذا مقطع فيديو قصير
عن رحلتنا:
https://www.youtube.com/watch?v=rEPTjsYPTb4
وفي النهاية أبي
أقولكم إنها تجربة جميلة جداً، بتتعلمون منها أشياء كثيرة مو بس على الصعيد
العلمي، لكن حتى على الصعيد الشخصي. والتردد في البداية أمر طبيعي ترى، لكن في حال
جتكم الفرصة توكلوا على الله وخذوها. وفي حال كان فيه أي نقطة حبيتوا إني أتكلم
عنها زيادة بلغوني لأني كتبت الموضوع على عُجالة بسبب بدء فترة الترشيح، وأي سؤال
أو أي مساعدة أقدر أقدمها حسابي بتويتر موجود وبالآسك كذلك.
أتمنى لكم كل
التوفيق، والاستمتاع بالتجربة والاستفادة منها بأكبر قدر ممكن.
السلام عليكم عندي سؤال
ردحذفعلى اَي أساس يتم ترشيح الطالبات ؟ يعني فيه شروط معينة لازم تتوفر في الطالبة ؟
الله يوفقك يارب في حياتك العلمية والعملية ��