السبت، 18 يونيو، 2016

مواد مستوى خامس ( السنة الثانية - الفصل الدراسي الثاني ) عام 1436-1437





السلام عليكم ورحمة الله وبركاته
بداية الحمدلله على أن أتم هذا الترم على خير بتيسيره وتوفيقه ..
بأذكر شيء مهم قبل لا أبدأ أتكلم عن مواد هذا الترم , دائماً أحاول لما اتكلم عن رأيي بمادة أو بعضو هيئة التدريس يكون رأي موضوعي اكثر من كونه رأي شخصي , لكن يستحيل يكون 100% موضوعي بحت ..
هالمرة بحاول أرتب طريقة عرض المواد أكثر ..
بسم الله نبدأ بمواد هذا الترم :


نبذة عن المقرر : يتكلم المقرر عن الميكروبات الموجودة في الأغذية , والعوامل المؤثرة عليها , ومظاهر الفساد الميكروبي في الغذاء , وسائل التحكم , واخر شيء التسممات والأمراض الي يسببها الفساد الميكروبي الغذائي .
عضو هيئة التدريس (نظري) : د.مسفر الدقل .
راح يكون شرح المادة عن طريق الشبكة , الدكتور راح ينزل لكم المحاضرات على الموقع الخاص فيه , ضروري تطبعونها قبل وقت المحاضرة , لأنه هو راح يحط لكم بس الاشياء الرئيسية والباقي كله تكتبونه معاه . ونصيحة لا تسجلون المحاضرة وتقولون بنكتبها بعدين , لأنها تقريباً ساعة ونص , عشان كذا اكتبوا معاه أفضل وقت المحاضرة ولا تتوهقون زيي =)) الدكتور ماراح يقصر معاكم ابد من ناحية الشرح , وما يعترف أبد بشيء اسمه بونس , يعني لا تتعبون نفسكم وتحاولون معاه =)
بالنسبة للاختبارات : بعد كل ميد بالعادة يورينا اوراقنا ويقول لو فيه أي ملاحظة اكتبوها وانا اطلع عليها . وعلى طاري الاختبارات , تراه (دقيق جداً) بالتصحيح . يعني يدقق على الكلمة الوحدة عشان كذا اكتبوا الجملة كاملة لا تقولون طيب معروف . وطريقة توزيعه للدرجات غريب هههههه لكن يساعد .وغالباً يجيب لكم مثلا 10 اسئلة يقول حلو 7 منها . 
اعطانا نهاية الترم ملف فيه تقريبا 50 سؤال , كان ودي احطه لكم لكنه حاط عليه باسوورد ولا بغيت انقلها احتراماً لرغبته , ان شاء الله بيعطيكم اياه ^^
عضو هيئة التدريس (عملي) : ا.وحيدة القحطاني
الحاجات اللي بتسوونها بالعملي اغلبها مكرر , ماعدا كم معمل حيكون جديد شوي عليكم , عشان كذا العملي ما حيكون صعب ان شاء الله . بالنسبة لإستاذة وحيدة , ضروري تكتبون معاها بعض الحاجات المهمة اللي هي تقولها لأنه برضوا احياناً تقول أشياء مو موجودة بالسلايدات . وانتبهوا تتكلمون كثير =) ما تحب الاسئلة الكثيرة ولا الكلام الكثير . غالباً تعطيكم بعد كل لاب واجب , احرصوا تحلونه وتجيبونه اللاب اللي بعده ضروري . وركزوا أول بأول على المجاهر والصور .
الفاينل جانا فيه مجموعة مجاهر نتعرف عليها وعلى كل مجهر سؤال , وجانا كمان صح وخطأ إذا مو ناسية . عشان كذا أقولكم ركزوا على المجاهر كويس . وبالنسبة لنتائج التجارب , الاستاذة تحدد معاكم (يوم واحد بس ) تفتح فيه المعمل عشان تشوفون النتايج غير كذا مافيه مو زي المواد الثانية عشان كذا احرصوا تروحون وما تنسون .
بالنسبة للواجبات , كنت اشاور نفسي الى اخر لحظة انزل لكم الاجوبة ولا لا =) لكن قررت يكون لا . لكن لو فيه أي سؤال او استفسار عن أي واجب حياكم الله .  


نبذة عن المقرر : المقرر شبيه جداً بالكيمياء الحيوية , يتكلم عن الطاقة واهميتها ودورة تحليل الجلوكوز ودورة كربس وأيض الدهون والنيتروجين واخر محاضرتين كانت عن الوراثة , بالإضافة إلى دور الميكروبات في مجالات الحياة المختلفة .  
عضو هيئة التدريس (نظري) :  د.تغريد المانع .
هنا أنا آسفة ما اقدر اكون موضوعية من الحين اقولكم هههههه . لا جد , قبل لا ادرس عندها كانوا البنات يقولون لي بتدرسك دكتورة مادة المناعة , الله يعينك صعبة صعبة وشديدة واسئلتها دقيقة . والله اذكر اني كنت شايلة هم هالمناعة من كلامهم وبما اني ماشاء الله ما انسى الاسماء =)) ما تذكرت وش اسم دكتورة المناعة . وسبحان الله , درست الفسيولوجي معها , ولما كنت اسولف عنها قالو وش اسمها ؟ لما قلت د.تغريد انصرعوا =) عشان كذا اقولكم لا تاخذون على كلام او رأي احد 100% .
المهم د.تغريد كمية لطافة وذوق مو طبيعية :") .  المادة كماً كثيرة ترى –ذاكروا أول بأول- لكن هي كانت مسهلتها علينا يعني ماكنا حاسين بالكمية . ولو عندك شيء ما فهمتيه تعيده لك وتحاول معاك لين تفهمينه يعني أبداً ما تقصر معاك . ونفس نظام د.مسفر هههههه ما تعترف بشي أسمه بونس , يعني من الحين بعد اقولكم لا تتعبون نفسكم . وفيه شيء بعد , لما تحددون موعد معاها للميد او للكويز تأكدوا انه يناسبكم اكيد لأنها ماتحب احد يغير المواعيد . ولو تبين شي يُفضل تكلمينها وتتفقين معاها وجهاً لوجه لأنها نادراً نادراً ترد عالإيميلات –بس تراها تقرأها- =)))
بالنسبة لأسئلتها , دقيقة شوي , يعني ذاكري بتركيز , نظام تتصفحين المادة أبداً ما يمشي . تجيب تعاريف ومصطلحات مره كثير , تجيب فراغات بعد كثير . عددي واشرحي , يعني اغلب الاسئلة اللي فيها كتابة تجيبها . وتوزيعها للدرجات وكثرة الاسئلة مرة بطلة , تخليك ما تنقصين بالأخير كثير .
عضو هيئة التدريس (عملي) :  ا.أمل العتيبي + ا.ريم الجويعي
درستنا الجزئية الأولى ا.أمل . انسانة اتعب وانا اقول اخلاق جميلة :") تحترم الشخص بشكل مدري وش اقول :") . بالنسبة لي اشوف انها وقت العملي افضل من وقت الشرح النظري . يعني تبدع بهالجانب اكثر . اكثر انسانة ابثرها وقت الشغل ومتحملتني والله هههههه . بالنسبة للجزئية الثانية درستنا ا.ريم . برضوا ا.ريم انسانة جداً جميلة وشرحها ب ط ل ماشاء الله . لكن على قد ما تشرح على قد ما تبي التقارير كاملة وكويسة =) يعني تراها دقيقة مرة بالتقارير وتكره شيء اسمه أوراق =)) كل شيء تعاملوا معاها  الكتروني فيه . ونصيحة افضل طريقة عشان يكون تقريركم كويس اكتبوا معاها كل شيء , واسألوها عن كل شيء وقت المعمل لأنها تراها ما تنزل لكم المعمل إلا بعد ما تسلمون التقرير =) .
معامل الفسيولوجي ممتعة , لكن سوو لكم جدول , وحطو كل تجربة متى تروحون تشوفونها عطشان ما تلخبطون , لأنه غالباً البكتيريا تتحضن 24 ساعة بس الفطريات لا اسبوع . واحيانا فيه تجارب لازم كل يومين تروحين تسجلين النتايج اللي تطلع لك . هذا الشيء تعبنا مرة لأننا ما كنا نعرف كيف الوضع . بس أنتوا لا تسوون زي غلطنا , رتبوا لكم جدول وحطو تنبيه ووضعكم بيكون بالسليم ان شاء الله ( مو بس هذي المادة اعتمدوا هالشيء مع كل المواد )
مرفقات للمادة : 
عندكم بالرابط هذا موضوع كامل كتبته عن دورة تحلل الجلوكوز + جدول بيساعدكم تحفظونها ( مرة مهمة ) : 
http://madainsaleh2.blogspot.com/2015/04/101.html
وهنا فيه مقارنة بين عملية الهدم والبناء بالدهون , هي كانت حاطتها لنا على شكل برجراف انجليزي فترجمتها وسويتها على شكل جدول عشان يكون اسهل (وجتنا بالميد والفاينل ترى ) : 
https://www.4shared.com/office/1VprtecHba/_________.html


نبذة عن المقرر : يتكلم المقرر عن أنواع الطحالب و دورات التكاثر في بعض الأنواع و تثبيت النيتروجين والسموم الطحلبية .
عضو هيئة التدريس (نظري) :  د.سارة الراشد
تكلمت قبل عن الدكتورة في مقرر العوالق المائية . اسلوبها بالشرح جداً هاديء ويخلي الكلام يدخل براسك بطريقة تتذكرينها دايم . زي ما قلت مره تهمها الملزمة , ومهمة لك أكثر عشان تكتبين دايم معاها . ركزي عالاسئلة اللي تقولها وقت الشرح . ومن الحاجات المهمة حضوركم وقت المحاضرة (بدري) لأنها تعصب لما احد يتأخر , وتكره سالفة الجوال اللي على الطاولة او اللي مو صامت , يعني عشان تكونوا بالسليم :  تعالوا بدري , جوالاتكم بالشنطة , معاكم ملازمكم , مركزين وتكتبون .
بالنسبة لإختباراتها , جداً يهمها طريقة اجابتك على السؤال , يعني ترتيبك للأفكار + انتقاءك للمصطلحات , عشان تعرف أنك فاهمة وش تقولين . مره تقدر جنس النوستوك , اكثر طحلب يجي وحيجيكم غالباً بكل الاختبارات لأنه طحلب نموذجي فيه كل الأشياء اللي تهم . برضوا ركزو على عملية تثبيت النيتروجين – الحويصلة المغايرة  – السموم الطحلبية . وقت شرح دورات التكاثر اكتبوا معاها عالرسمة هذا بحد ذاته يغنيكم تماماً عن الحكي بالمكتوب + اسهل لكم بكثير .  
عضو هيئة التدريس (عملي) :  ا.مديحة العنزي + ا.شروق الشهراني
هذولي الاستاذتين كل وحدة الطف من الثانية :") صدق الله يسعدهم بس :" . ا.مديحة دقيقة مرة مرة بالرسم , يعني اذكر كانت تقول ليش الدائرة هذي مو قد اللي فوقها =)) . شرحها جداً جميل هي و ا.شروق وفيهم كمية هدوء تخلي الواحد يروق هههههه . اختباراتهم كانت مجاهر تعرفي وارسمي , اسئلة رسم . يعني ما كان فيه كلام وهالشيء سهل علينا مرة الله يسعدهم .
مرفقات للمادة : 
هنا جمعت لكم اغلب مصطلحات المادة , ركزو عليها لانها جابت لنا جدول فيه مصطلحات .. : 
https://www.4shared.com/office/sJHwZCdPba/__online.html

نبذة عن المقرر : هذا المقرر يتكلم عن الأحياء الدقيقة في البيئات المختلفة , وركز اكثر شيء على التربة و عن العوامل المؤثرة على الكائنات , أهميتها , تأثيرها على البيئة . تكلم برضو عن دورات بعض العناصر (بشكل مبسط ) واخر شيء كان عن الاتزان الميكروبي و التلوث الميكروبي .
عضو هيئة التدريس (نظري) :  د.إسلام عبيد
د.إسلام بعد لطيفة مرة :") تساعد كثير بالميدات والفاينل , يعني تجيب لك الجمل نصاً مافيه لف ودوران . عشان كذا وانتِ تذاكرين ركزي . وأي شيء فيه تعداد ركزي عليه مرة . وبالنسبة للمنهج فيه مشكلة صغيرة , الكلام اغلبه مكرر , وغير كذا مافيه عناوين رئيسية كثير عشان كذا وانتِ تذاكرين افضل شيء تسوينه انتِ قسمي الاشياء . وفيه تعدادات ترى مو واضحة يعني كلام بكلام , انتِ وضحيها لنفسك ^^ . لكن بشكل عام اغلب الكلام مكرر كثير يعني ما حتشوفون فيه صعوبة .
عضو هيئة التدريس (عملي) :  ا.مديحة العنزي
ا.مديحة درستنا المادة هذي كمان , زي ما قلت لكم اغلب الاشياء مكررة يعني عزل بكتيريا عزل فطريات وهكذا . وهالمادة بعد نفس ما ذكرت قبل سوو لكم جدول لأن تجاربها تطول تاخذ شهر أحياناً ولازم تشيكون عليها دايم . بتلاحظون فيه تشابه بينها وبين ميكروبيولوجيا الاغذية بأخر المعامل حقت الألبان واللحوم .
مرفقات للمادة : 
 هنا  وحدة من البنات الله يسعدها كتبت المصطلحات : 
https://www.4shared.com/office/jkXdRWoNce/_______1_.html

نبذة عن المقرر : يتكلم المقرر عن الأشنات , أشكالها , تركيبها , اماكن معيشتها , العلاقة الفسيولوجية بين الفطر والطحلب , أهم الخصائص اللي تميز الفطريات الأشنية والطحالب الأشنية عن غيرهم , الأهمية الاقتصادية للأشنات .
عضو هيئة التدريس (نظري) :  د.فاطمة العتيبي
من الدكتورات اللي تعبناهم معانا هالترم هههههه . والله الله يسعدها صبرت علينا =) . المادة والله سهلة بس مدري وش جانا :/ مخنا يقفل عند الفراغات =) . بالنبسة لاختباراتها تجيب فراغات كثير عشان كذا ركزوا كويس وانتوا تذاكرون . لأنه كلمة وحدة تفرق فركزوا . المادة مو كثيرة , ومو صعبة . يعني ذاكري أول بأول ووضعك بيكون بالسليم . وركزوا بعد على الصور وعلى الرسمات تجيب رسمة الطبقات لتكوين الاشن , وتجيب صور التراكيب الأشنية حقت السرويدات والأشياء هذي .
عضو هيئة التدريس (عملي) : ا.مشاعل السيد
ا.مشاعل الله يجزاها خير تشرح لكم العملي كأنه نظري =)) يعني هالشيء بيسهل عليكم كثير النظري لأنه بينعاد =) . ولازم تكتبون معاها لأنه السلايدات اللي تعطيكم إياها مافيها كلام كثير ( نفس نظام د.مسفر ) . وتراها تعطي بونس على الاسئلة عن المعمل السابق . وانتبهوا انتبهوا انتبهوا تفكرون تصورون المجاهر هههههه . صدق والله مره تزعل وتعصب عشان كذا حاولو تحفظون الشكل عن طريق رسمها , وابحثوا عنها بالنت . بالنسبة للفاينل الله يسعدها سهلته علينا مرة مرة مرة . يعني أبداً ما توقعناه كذا . أنتوا اكتبوا معاها , ذاكروا أول بأول , لا تصورون المجاهر , ووضعكم حيكون تمام التمام إن شاء الله ^^ . ( ماراح تشتغلون إلا معملين بس الباقي زي ما قلت لكم كله نظري ) .
مرفقات للمادة : 
 هنا ركزو معاي شوي =) هذا الرابط فيه مصطلحات جمعتها لكم وحدة من البنات كمان الله يسعدها : 
https://www.4shared.com/office/R4197rn7ba/__online.html
وهنا بهالرابط (مهم مهم مهم ) تراني قلتها 3 مرات =)) فيه مقارنات وجداول مره مهمة : 
https://www.4shared.com/office/PlvCX5K4ce/__online.html

نبذة عن المقرر : هالمادة تتكلم عن تركيب الخميرة , العوامل المهمة لنمو الخميرة والعوامل المؤثرة على نموها , طرق تصنيع الخميرة قديماً وحديثاً , انتاج البروتين احادي الخلية , الاهمية الاقتصادية للخميرة .
عضو هيئة التدريس (نظري) :  د.أمل الموسى .
د.امل انسانة جداً تحترم الطالبة وهادية مرة . أول وأهم شيء بقوله لكم عن المادة , تراكم بتكتبون المنهج هههههه . ولا تحاولون ابد ابد ابد انكم تقولون للدكتورة تعطيكم المنهج جاهز لأنه هذي طريقتها =) . بس للأمانة كل مرة اخذ عندها مادة اتحلطم عالكتابة بس بالنهاية هالطريقة تثبت المعلومات , يعني فيه حاجات بحدق 140 اذكرها كأنها واقفة هي تقولها . بالإضافة للي بتكتبونه بتزل لكم عروض فيها صور , ركزوا عالصور , احفظوها زي ملامحكم , لأنه احياناً تغير شيء صغير مرة محد ينتبه له =) فلا تغلطون غلطتنا =) بالنسبة للأسئلة , د.امل هي الدكتورة الوحيدة اللي ما اقدر اقولكم ترى بيجيكم كذا وكذا =) لأنها دايم تغير بطريقة الاسئلة لكن من باب الاطلاع تحت بتقلون ملف فيه الاسئلة اللي اذكر انها جابتها اطلعوا عليها ^^ .
عضو هيئة التدريس (عملي) :  ا.امل العتيبي + ا.نجلاء آل الشيخ
العملي تجاربه خفيفة ولطيفة – ماعدا تجربة العد بتنحول عيونكم - =)) , بس بشكل عام لطيفة المعامل ومع ا.امل و ا.نجلاء بعد بتصير خفيفة . بالنسبة للأسئلة , ا.امل ركزوا بجزئيتها على الخطوات العملية والارقام , مره تحب الارقام . اما بالنسبة لجزئية ا.نجلاء فبتجيب لكم مسألة العد =))) فيه جدول بلتقون فيه مربعات هذا جابته لنا .
مرفقات للمادة : 
 بالرابط بتلقون الاسئلة اللي قلت لكم عنها : 
https://www.4shared.com/office/w3KhUT_3ce/___online.html


ليست هناك تعليقات:

إرسال تعليق