إرشادات السلامة في المعامل Laboratory Safety ..

بسم الله الرحمن الرحيم

فيه موضوع من زمان كان ودي احكي عنه .. بس عاد ما فضيت لانه يبيله شوي مخمخه .. والحمدلله توي مخلصة اختبارات يعني بجلس لكم صح =) ) < بس مو كثير صح لانه دوامي يبدا الاسبوع الجاي ان ربي احيانا =))

ودي احكي لكم عن المعامل LABS

التخصصات العلمية والصحية لابد ياخذون مواد فيها معامل , والمعامل جميلة جميلة جميلة

"لو علي الغيت الجزء النظري وخليت كل الدراسة معامل =)) " لكن فيه حاجات مره مهمه لازم تعرفونها.

مو بس اللي اول مره ياخذون معمل , لا , كل الناس اللي تاخذ معامل حتى لو كانت من زمان

... ... ... ...

اول حاجة واهم حاجة واللي كثير بنات يستهينون فيها " ويقهروني " اللي هي السلامة !

في كل مادة فيها معمل لازم يحكون لكم اول معمل عن السلامة ,  لانها مره مره مهمه

وللاسف بنات كثير يستهترون بهالشي !

ويزعلون بعد لو نقصتهم التيتشر لما ما يلتزمون !

ارشادات السلامة اولا واخيرا محطوطة لك انتي !

خلونا نذكر هنا بعض الارشادات واللي اكثر شي البنات يسحبون عليه .. لانه اكيد فيه ناس لسه ما اخذت معامل وما تعرف ايش هي ارشادات السلامة

  

نجي لاول حاجة .. اللاب كوت !

·        اللاب كوت مره مره مهم .. مو بس عشان شكل انه انا لابسته باللاب .. عشان لا سمح الله انكبت عليك مادة حارقة

مسك فيك لهب .. يكون اسرع شيء تقدرين تفكينه وترمينه

وما يلصق اللبس بالجلد تبعك ..

·        الجزمة وانتوا بكرامة .. نفس الشي دايم يحرصون نلبس جزم تكون مغطية الرجل بالكامل عشان لو انكب شيء بالغلط عليك ما يلمس جلدك على طول

·        نجي للشعر وما ادراك ما الشعر .. بيني وبينكم انا احيانا انسى في اليوم اللي يكون عندي فيه معمل ما افك شعري

لكن لما اتذكر او تذكرني التيتشر على طول المه , لأنه ممكن و أنتِ تشتغلين خاصة لو كان فيه شيء يحتاج نار او تعقيم

تمسك النار بشعرك , وقد صارت ببنات كثير , عشان كذا حاولي ما تتأففين وتجلسين تقولين استغفر الله , كله لمصلحتك !

بالنسبة للماسك ( الكمام ) برضو مهم مهم مهم بالذات لو كان فيه مواد نفاثة او متطايرة

عشان ما تستنشقين ام ام المواد =))))

الهود :

اللي بالصورة فوق اسمه الهود , غالبا المواد الحارقة والخطرة ما تشتغلين عليها المفروض برى الهود ولازم تكونين حريصة مره مره وانتِ تصبين هالمواد

.......................

الموقف الأول 

مره اذكر كان عندنا معمل في الجزيئي وكانت التيتشر حقتنا مصرية , المهم في التجربة كنا نستخدم مادة مسرطنة + جهاز فيه اشعة فوق بنفسجية ( تسبب سرطان) , المهم انه هالتيتشر ما جازت لي من اول معمل , ما غير تسولف وتقول قصص وتنكت وحالتها حاله , ولما تشتغل ما كانت مهتمة ابدا ابدا بإجراءات السلامة , غير انها كانت تدرس صاحباتي بالصحي وماكانو يمدحونها ابد , المهم بهالتجربة نادت البنات تعالو تعالو قربو شوفو الاشعة , وتفتح بالجهاز وتسكر , وانا ارمقها من بعيد بنظرات " تحلمين اجي" , وما رحت والله صرت اتفرج من بعيد , وجتكم اختنا بالله ماسكة المادة ومدرعمة فيها , مدري وش صار وانكبت عليها !

وماكانت لابسة قلفز !

ونفست علينا وقامت تهاوش , وقفلت اخلاقها والحالة حالة , المشكلة هي الغلطانة الله يهديها !

انا حمدت ربي مليون مره اني مارحت جنبها =) طبعا هو ما حيجيها كانسر من بكرا لكن كثرة التعرض لهالمواد والاستعمال الخطأ لها يزيد من احتمالية الاصابة

.......

الموقف الثاني 

 في معمل الفسيولوجي كان عندنا تجربة عن عد كريات الدم البيضاء بحيث ان زادت عن معدل محدد معناها انه فيه خلل ( مرض *) .. المهم انه البنات طفشو من كثر ما نغزز نفسنا بالابر ونطلع دمنا لأنه ماكانو موفرين لنا عينات دم !! فقالو مجموعة بنات احنا بنروح للمستشفى نسحب دم مننا ونجيبه وكل اسبوع يصير على وحدة وتوزعه عالبنات

قالو التيتشرات اوكي ! , والله وجا هذاك اليوم وجابت لنا وحدة من البنات عينه , وماكان عندنا اجهزة متقدمة لانهم مستغلينها علينا هههههههه فكنا نستخدم طريقة قديمة اللي هي نسحب الدم بانبوبة بفمنا وبعدين نقطرها وسالفة لين تضبط ,, والله وجلسنا نحوس ساعة خاصة بتنظيف الانابيب لأنه مليون الف بنات شافطة ام الانبوبة L

لما خلصنا وفحصنا وعدينا الكريات , التيتشرات وجيههم تقلبت , قالو تأكدوا من العد !! قلنا متأكدين والله !!

وجلسو يعدون , وبعدين طالعو في بعض وراحو على جنب يحكون

المهم جو قالو : " بنات مين جايبه العينة ؟؟؟ " قالت وحدة من البنات انا ! قالت لها منك انتِ ؟؟

قالت لا , اعرف احد بالمستشفى وطلبت عينة دم وعطاني اياها

حسيت انهم ودهم يذبحونها =)) عصبوا وقالو مو احنا قلنا لكم ان العينات تكون منكم ؟؟؟؟ كيف تجيبون عينة من شخص ما تدرون مين هو اساسا ؟؟؟ وكيف المستشفى تعطيك عينة شخص مصاب ؟؟؟؟ بنات ترى العينة مو سليمة . فرجاءا رجاءا عقمو نفسكم وغسلو كويس ولا عاد تجيبون عينات ابد !!!

" البنت هذي الله يهديها تساهلت بالسالفة لكن ما حسبت حساب حاجة زي كذا !!! وتخيلو لو بنت مو مهتمة بسالفة غسيل اليدين قبل ما تطلع من المعمل وطلعت وراحت اكلت شي وش تتوقعون ممكن يصير ؟؟؟ عشان كذا اقولكم السلامة و الارشادات مهمة مهمة مهمة "

................

الموقف الثالث 

 ومرة كان فيه تجربة عندنا نستخدم فيها مواد بالهود ( المكان اللي قلت لكم عليه فوق ) , كان فيه قروب بنات قدامي ومسوين هم الواو والقويات J فاهمين الهياط غلط !!

المهم صارو يطلعون المواد برى الهود ويجلسون يضحكون وانا عيني على العلب اخاف لا تطيح وكنت انا وصاحباتي ناقدين عليهم !! جينا قلنا حرام يمكن ما انتبهو للتيتشر وهي تنبهنا , قلنا لهم: " بنات ترى التيتشر قالت المواد هذي حارقة ! وتراكيزها مو مخففه ! انتبهو" قامو ضحكو وقالو" مع نفسها بس" , لفو على بعض وقالو "خلونا نحط أي قياسات مو لازم نفس الحجم اللي قالت عليه"

م ن ج د ك م ؟؟؟؟؟؟؟؟ جلست اقول يارب انهم يمزحون !!!! طلعو من جدهم والله ما يمزحون !!!

ربي ستر عليهم ما انكبت مادة على وحدة فيهم واكلت تبن جد وقتها وتعرف ان الله حق !!!

قامت التيتشر عاد عصبت وقالت لنا انه فيه وحدة السمستر اللي راح انكبت عليها مادة حارقة وسببت لها حروق من الدرجة الثانية !

ومواقف كثير خياس مرت علي ولازالت تمر !

ما اقول انه انا المثالية ماشاء الله علي , احيانا انسى حاجات مثل الماسك او غطا الراس يعني مو اتعمد

وصرت عشان ما انسى اشتري لي كمية كبيرة واحطها في اللوكر تبعي اضمن لي كذا

يعني احاول قد ما اقدر ^^

.. .. .. ..

اللي بأوصل له بالنهاية , انه محد بيحرص عليك وعلى صحتك كثرك انتِ ! ولا تستهينين بحاجات زي كذا , انتِ دخلتي تخصص خليك قد المسؤولية وتحمليها ! !