مستجدات كليتنا الجميلات (مستوى أول + مستوى ثاني ) 3>

 

 

السلام عليكم ورحمة الله وبركاته
اهلا بالمستجدات الجميلات بقسم الاحياء 3>
اكيد فيه حاجات نفسكم تعرفوها اكثر عن القسم ,لاني لما كنت مكانكم ماخليت احد ولا مكان الا وسألت ودورت
فعشان كذا حاسين بيكم حبايب قلبي
اول حاجة مبروك قبولكم بالقسم للي كانو حابين يدخلوه وللي دخلو وهم مايبغوه نقولهم شدو حيلكم عشان توصلو للي تبوه
القسم جدا جميل وممتع صح انه فيه كميات من المعلومات لكنه جدا ممتع ^^ وبالنسبة للي يسألو عن الفرص الوظيفية
انا من رأيي انه كل انسان يقدر هو يصنع فرصته بيده , تخصص الاحياء له مجال واسع وهو علم متطور يعني تقدري تخصصي لك ابحاث وتبدعي فيه ^^
وكله حيجي بوقته

مواد اول ترم حتاخذوها مواد عامة , يعني كانه ترم تحضيري وهي متطلبات لجميع الكليات تقريبا ^^
حتاخذو :
كيمياء عامة - احياء عامة - فيزياء عامة - حساب التفاضل والتكامل - تحرير كتابي
كلها حتكون بالانجليزي
هي معلومات عامة وكلها دارسينها من قبل

  نصيحة 
محاضراتكم ترجموها اول بأول , ولا تترجمو كل كلمة وكل حرف لانه هذا حيضيعكم زي ما ضيع بنات كثير وانتبهو انتبهو انتبهو تاخذو ملازم او محاضرات كاملة مترجمة
بنات مرة انحاسو وانخسفو بسبب هذي السالفة
بالنسبة للمصطلحات العلمية مع التكرار حتحفظوها لا تشيلو هم وتقولو بالانجليزي وصعب بالعكس كمية المعلومات مو كثيرة ابدا ابدا بس شدو حيلكم اول بأول ^^
والرسم والمعامل لا تراكموها على بعض حاولو بعد كل معمل تعيدو ترسمو وتراجعو التجربة عشان ماتنسو وتخلبطو بين التجارب والمعامل
الترم الاول حيعدي ان شاء الله بسهولة ولا تنسو شدة الحيل مافيه حاجة تجي من غير تعب ابدا

هنا حتبدو تخشو شوية بتخصص الاحياء مو زي الترم الاول ^^ ححكيلكم عن كل مادة حتاخذوها ان شاء الله

بديت فيها لاني كنت شايلة همها مرة مرة مرة , ماكنت ابدا احب الكيمياء العضوية وحوسة الالكانات والالكينات وهالحاجات
حتى اول ماشفتها بالجدول قلت لصاحباتي هذي المادة انا مستحيل اخذها هالترم ابيها صيفي بلحالها ومدري ايش
بس لما درستها المادة جدا ممتعه خاصة بالمعمل كان فيه حاجات جدا جميلة وتجاربها مرة حلوة
صح انه النظري يبيلك تحفظيه اول باول والمعادلات وكذا بس سهلة والدكتورات ربي يسعدهم كانو متعاونين معانا
واللي مخليها كمان سهله انها بالعربي ^^ (3 ساعات)
صدقوني حتنبسطو فيها ككككثير

النبات وما ادراكم ما النبات
انا عني ما احب النبات مرة يعني انا وهو مو اصحاب كثير , بس بغض النظر عن هذا المادة سهلة كانت والنظري كان اسهل شوية من العملي
لان العملي كله رسمات والرسمات كانت قريبة من بعض وكثيرة
بس كمان الدكتورات ماقصرو معانا ابدا
هي المادة ممتعة وحلوة وسهلة وماتملي منها , نصيحتي هنا حاولو تفرقو بين الرسمات وترسموها اول باول وركزو على المجاهر والعينات
وكمان ان شاء الله لما تدرسوها حتاخذو القسم التشريحي هذا حاولو تفرقو بينه كويس كمان
وهذي المادة بالعربي (3ساعات)

هذي المادة جميلة جميلة جميلة اتعب وانا اقول جميلة
معلومات كثيرة مررررة صح بس ممتعه , يعني مهما عدتي وزدتي فيه ماتملين منه , يحكي عن الخلية ومكوناتها واشياء دقيقة تصير جوى الخلية واحنا مو حاسين
حتحسي بهذي المادة بعظمة الخالق بجد كانت جدا ممتعة وحلوة
اغلب دكاترة المادة يحبو اشرحي , عددي , ارسمي يعني يبيلكم تركزو وتحفظو كويس
بالنسبة للمعمل ماكانت الاجهزة متوفرة فكنا ناخذه بكلاس وصور بس يعني ماحسينا بالعملي ابدا
المادة دسمة شوية بس جميلة وحتاخذوها بالعربي (3ساعات)

ما اجملها هذي المادة كمان (عمليا) لانه بالنظري شوية علة على ان المعلومات فيها مو كثيرة بس يمكن لان دكتورتنا الله يصلحها ماشدت علينا ><
المهم هذي المادة معمليا حتنبسطو فيها
حتاخذو كيف تفحصو العينات باالممجهر وكيف تاخذو عينة دم وحتفحصو حشرة كمان يعني شيء ممتع ^^
هذي المادة حتاخذوها بالانجليزي وساعيتن
النظري تبعها جدا قصير بس زي ماقلتلكم يمكن ماحبيته بسبب الدكتورة ان شاء الله انتو تصيرو افضل

هذي المادة طحنا بتيتشر ماتحضر ولا شيء , حضرتي اهلا وسهلا ماحضرتي خففتي علي هههههههه , بريطانية وشكلها ماكان لها خلق تجي
يعني صراحة ما اقدر اخبركم عن المادة شيء لانه كانت ماتشرح من الكتاب وحايستنا الله يصلح قلبها
بس عامة المنهج سهل يعني تقريبا ليفل 3 او 2 ^^

ياهلا ياهلا المادة حلوة وجميلة وكل شيء بس يعتمد على دكتورتك , احنا دكتورتنا كانت تحب المادة بزيادة فصعبتها علينا لكن الحمدلله عدت
واهم شيء بهالمادة ذاكروها اول باول لانها كككثير وكل الكتاب معاكم

1- على قد ماتحترمي الدكتورة قد ماتحترمك , حاولو دائما ما تدخلو بنقاشات حادة مع الدكاترة
2- اللي تقولك صعب ومانقدر وكيف نحفظ وكيف نخلص سكري اذانك عنها , انت حتقدري تسوي كل شيء بس حاول حتى لو فشلتي مرة حتنجحي بالثانية ان شاء الله
3 - المناهج بعضها انجليزي ؟ مو صعبة ولا تتحججي انه صعب لانه انجليزي لانه هذا شيء يعصب الدكاترة كثير , غير كذا لو تمسكيها اول باول وتترجمي (((الكلمات الصعبة))) مو كل كلمة حيصير عليك اسهل من الموية
4- ابحاثك ومشاريعك حاولي تخلصيها اول بأول ولا تراكميها لانك بالاخير حتنضغطي
5- وقت المحاضرة اكتب مع الدكتورة لانهم يقولون دايم حاجات مهمة ويجيبوها في الاختبار , اذا تقدري تتبعي معاها بالكتاب وتكتبي الملاحظات مرة افضل واحححسن
6- حاولي تجيبي كتبك اول مايطلبوها عشان تمشي مع الدكتورة
7- ساعات الغياب قليلة مو زي التحضيري فإنتبهو إنتهبو , وحاولو ماتغيبو بالعملي لانكم حتتوهقو واغلب الدكتورات يرفضو يعيدو شرح التجربة مرة ثانية
8- لا تستحي تسألي ابدا , لانك ان استحيتي حتتوهقي
9 - حاولي تعرفي اماكن كلاساتك قبل المحاضرة بوقت وركزي بالجدول ولا تسوي زيي انطردت اول محاضرتين لاني ماركزت بالجدول
10 - توكلي على الله قبل كل حاجة وشدي حيلك واعرفي انه مافيه حاجة مستحيلة ^^

اتمنى اكون افدتكم لو بحاجة قليلة واي سؤال او حاجة جاهزين لكم ^^ حياكم بأي وقت