بسم الله الرحمن الرحيم
الحمدلله من قبل ومن بعد .. خلصت اختبار الـ IELTS اللي لي سنة وكل ما جيت أخذه سبحانه الله ما تتيسر
كنت مره شايله همه لأني ماقد جربت اختبره والإنسان عدو ما يجهل زي ما يقولون =) وفعلاً هيبة ورهبة الاختبار الحمدلله راحت لما جربته وعرفت وش سالفته =)
المجموع الكلي اللي جبته كان ٧ الحمدلله .. وكان ممكن أجيب أعلى في ظروف أفضل بس مره مبسوطة وراضية بالنتيجة عشان كذا قررت ما أعيده =)
بالنسبة للتحضير للاختبار .. جتني أسئلة كثيرة بعد مشاركة النتيجة عن كيف استعديت للاختبار
الاختبار يعتمد بشكل كبير على التكنيكات اللي تقدر تستخدمها وتطورها .. وبعد ما جربت كم تكنيك أقدر أقول كل واحد فينا له طريقة خاصة يرتاح ويبدع فيها ..
فيه كثير مراجع تمدح تكنيك معين وإنك لو استخدمته بتحقق نتايج خرافية .. ما أنكر إنها تساعد بس لازم تجرب كذا مصدر لييييين تلقى الطريقة المناسبة لك ولا تحاول تجبر نفسك تتقن شيء مو قادر تتعامل معاه يمكن هالطريقة ماتناسبك وبكذا تضيع وقتك عليها ..
أول مصدر صراحة اعتمدت عليه وأشكره من كل قلبي على الاتقان والإبداع والتطوير المستمر والإحسان في العطاء : دورة عبدالرحمن الحجازي
https://dalilk4ielts.com/ielts-course/
أخذت الدورة المكثفة عنده ومدتها كانت سنة وبعد السنة قلت له إذا ممكن أمددها لأني ما قدرت اختبر وتقبل بصدر رحب وقال أبد كم تبين تمديد؟ وكان بدون مقابل حتى.
غير إن الدورة ثرية بالمحتوى والمصادر فيها منصة تفاعلية وأسئلة تجاوب عليها.
فيه أشخاص ما عجبتهم الدورة بسبب اللهجة العامة، بالنسبة لي كانت مقبولة وبالعكس كان يكتب أشياء كثير تضحكني. وكان يتابع معاي أول بأول عن طريق الواتساب ويجاوب على كل أسئلتي.
وحتى لما لخصت المحتوى واستأذنت منه لو ممكن أنشره قال أبد خذي رااااحتك.
هذي الملخصات اللي سويتها للي حاب يستفيد منها:
https://www.4shared.com/folder/AaQgSZPC/_online.html
الملخصات فيها كل التكنيكات + القوالب اللي تكلم عنها عبدالرحمن للكتابة ومره تساعد في ترتيب الأفكار
أنصح فيها ؟؟ نعععم بس بشرط يكون عندك وقت كافي .. يعني قبل الاختبار بـ ٣ شهور لأن الدورة ماشاء الله ثرية بالمعلومات والتقنيات وتحتاج وقت عشان تستفيد منها. ومره ساعدتني أفهم الاختبار بشكل أوضح وخففت شوي من رهبته.
وعبدالرحمن نزل خطة للمذاكرة للأشخاص اللي عندهم بس شهر قبل الاختبار
(الصورة ناشرها عبدالرحمن في حسابه وناشر مصادر كثيرة ممكن تستفيدون منها)
بالنسبة لي ما قدرت أمشي عليها الصدق =) سويت لي خطة تناسب نقاط القوة والضعف عندي فكنت كل يوم تقريباً أخذ نص ساعة محادثة تدريب مع مختبر معتمد على منصة كامبلي والكتابة أخذت أسبوعين عليها لأني كنت أبي آتمكن منها والحمدلله مره استفدت منها
وباقي المهارتين عارفة إني الحمدلله ممتااازة فيها فما مارستها إلا كم يوم
كنت مخططة آخر أسبوعين أسوي اختبارات كاملة وانتبه لنقاط القوة والضعف عندي واستفيد منها بس صار عندي ظرف ووقفت تماماً
آخر يومين قبل الاختبار اخذت اختبارين وحاولت أصحح الأخطاء واستفيد منها.
بالنسبة للمواقع اللي تعطي اختبارات كاملة في هذا الموقع :
وهذا الموقع:
الموقع الثاني عنده ميزة مو موجودة في الأول : بعد كل اختبار يقيس درجاتك في الأسئلة ويعطيك نقاط الضعف والقوة.
مثلاِ لو كانت أغلب الأخطاء بسؤال الاختيارات يوضح لك هالشيء بعدين يعطيك اقتراحات وروابط عشان تقوي نفسك بهذا النوع من الأسئلة.
بالنسبة لجهة الاختبار .. اللي أعرفه فيه جهتين ممكن تحجز اختبارك منها :
British Council
(https://www.britishcouncil.org)
جهة بريطانية
International Education Specialist (idp)
https://www.idp.com/saudiarabia/?lang=en
جهة استرالية
أنا أخذت اختباري من الـ British Council ومافيه سبب الصدق وماكنت أعرف إن فيه جهة ثانية إلا اليوم =) كنت آتناقش مع مختبر للايلتس وقالت لي فيه أكثر من جهة تقدم الاختبار. واللي عرفته إن الجهة الاسترالية مصادرها متجددة للمذاكرة ، وأعتقد يعطون خصم للاختبار لو أخذت الكورس عندهم أو العكس.
فيه ميزة جديدة متاحة الآن إنك تقدر تعيد قسم واحد مو الاختبار كامل. بعض الجهات تطلب درجة معينة لقسم معين فبدال ما تعيد الاختبار كامل تقدر تعيد قسم واحد بس لازم تتأكد إن الجهة تقبل هالشيء لأن مو كل الجهات تقبل.
والمبلغ كان تقريباً ٩٠٠ ريال.
أهم شيء توكلو على الله وركزو على التكنيكات المناسبة، والممارسة للاختبار لضبط الوقت اللازم، والتدريب على الإملاء والكلمات.
والله يوفقكم وييسر لكم ويفتحها عليكم ياااارب وتبشرونا بحصولكم على النتائج اللي تطمحون لها.
