اختبار تصنيف هيئة التخصصات الصحية (طريقة التسجيل - طريقة المذاكرة مع الملخصات والمراجع - طريقة الاختبار )

 

 

بسم الله الرحمن الرحيم 

في هذي التدوينة بشارك معاكم تجربتي في اختبار هيئة التخصصات الصحية لرخصة الأخصائي. 

التسجيل للاختبار: بالنسبة لي زميلات الدوام الله يسعدهم ساعدوني بالتسجيل لكن لقيت هذا الملف بأحد مجموعات التيليجرام لشخص اسمه أبو ليلى يشرح طريقة التسجيل بالتفصيل الله يعطيه العافية فقلت بشاركه معاكم للي ما سبق له وسجل من قبل ولا يعرف كيف : 

https://www.4shared.com/s/fRx_qBMYCge

المذاكرة: فترة المذاكرة كانت تقريباً شهرين ونص أول فترة منها كانت مذاكرة المعلومات العامة عن الأقسام بحيث كل أسبوع أذاكر قسم وألخصه عشان استرجع معلوماتي لأن رسالة الماجستير وشغلي في مركز الأبحاث يتركز أكثر على الفيروسات والتقنيات الجزيئية فباقي الأقسام أحتاج إني استرجعها. 

طريقة المذاكرة : أول قسم بديت فيه كانت الـ Safety and Quality  . بعدها بديت بالفيروسات وكان التقسيم بناءً على الأسهل بالنسبة لي عشان أقدر أدخل في جو المذاكرة لأنه الانقطاع فترة بعدين العودة للاختبارات صعب شوي. 

بعدها بديت بالميديات وتقسيماتها ومكوناتها والغرض من كل وحدة فيهم لأنها بتجيني كثير بالبكتيريا والفطريات فقلت أبدأ فيها بحيث تثبت معاي لما تتكرر بجزئية مذاكرة البكتيريا والفطريات (بحط لكم المراجع كلها تحت). بعدها بديت بالبكتيريا لأن أكبر نسبة كانت عليها فكنت أبي كل تركيزي وجهدي يكون فيها بعدها الفطريات لأنه فيه أفكار مشتركة بين القسمين زي الزراعة على الميديا والفحص الميكروسكوبي. وآخر شيء ذاكرته المناعة الطفيليات. وكنت كل مامرت علي معلومة جديدة من التجميعات أو أي مكان آضيفها عندي وما أحفظ بدون ما أفهم أبد. لو كانت فيه مرض ما عرفته آو مصطلح جديد علي أروح أبحث عنه وأقرأ. يأخذ وقت منك بس المعلومة بهالطريقة تثبت بشكل أكبر. 

المراجع: نصيحة سوو لكم ملخص خاص فيكم أو اعتمدو ملخص تشوفونه مناسب كملف أساسي لكم لأنه مع كثرة المارجع بيصير عند الواحد تشتت بعكس لما يكون عندك ملف أساسي تضيف عليه المعلومات وتجمعها وتقدر تربط بينها.

في البداية قبل لا أبدأ دخلت دورة أبو رشاد عشان أبي أخذ فكرة عن الاختبار والتقسيمات وطبيعة الأسئلة وكنت أرجع للتجميعات اللي أعطانا إياها وأراجع منها. 

أول مرجع بديت منه المذاكرة كانت عروض هند وريم الله يكتب أجرهم وبعدين بديت أذاكر الفيروسات والبكتيريا من كتاب لكن حسيته أخذ مني وقت طويل ومع الدوام والمسؤوليات الثانية  فصرت أمر عليه بسرعة أشوف الأشياء المميزة بكل بكتيريا وأكتبها بعدين لقيت ملخصات مسوينها أشخاص مختلفين الله يسعدهم ويفتح عليهم وبديت أستعين فيها. و فيه كتاب عين شمس كله عبارة عن أسئلة كنت لما أطفش من المذاكرة أحدد عدد معين من الأسئلة مثلاً ٢٠ سؤال وأحلها وأشوف كم أجيب درجة وأتعلم من الأخطاء. قروبات التيليجرام تساعد كثير والناس اللي فيها الله يسعدهم جداً متعاونين ولو فيه أي سؤال بيحاولون يجاوبونكم عليه دايم. 

 

كل الملفات اللي درست منها (ماعدا ملفات دورة أبو رشاد لأنه ما يسمح بنشرها) رفعتها لكم على هذا الرابط  ( إذا فيه أي ملف مرفوع وصاحب الملف لا يقبل برفعه بلغوني الله يعافيكم عشان أشيله)  

 

https://www.4shared.com/folder/aEOpf68T/__online.html

 

 

الملخصات اللي سويتها وذاكرت منها (شرحت البكتيريا والفطريات على اليوتيوب بطريقة قصصية تسهل عليكم الربط بين المعلومات وتذكرها بإذن الله) تلقونها في هذه الروابط:  

ملخص البكتيريا : https://www.4shared.com/s/fRx_qBMYCge

 

ملخص الفطريات: https://www.4shared.com/s/f1UuSS2kHfa

 

وهذي روابط الشروحات : 

 

طريقة قصصية للربط بين أنواع البكتيريا واختبارات الكشف ( جزء البكتيريا الموجبة لصبغة جرام )

 

 

 

طريقة قصصية للربط بين أنواع البكتيريا واختبارات الكشف ( جزء البكتيريا السالبة لصبغة جرام )

 

 

طريقة قصصية للربط بين أنواع البكتيريا واختبارات الكشف ( الجزء الثالث والأخير )

 

 

  

طريقة قصصية لمذاكرة جزئية الفطريات

 

 

 

 

الاختبار: يختلف اختبار الفني عن الاخصائي بشيء بسيط من حيث مستوى صعوبة الأسئلة والمحتوى. فالاخصائي يكون فيه أسئلة عن الـ Urine Analysis  . هذي الجزئية للأسف ما ذاكرتها وجت عليها يمكن ٦ أسئلة فلا تنسون تذاكرونها (حطيت لكم مرجع لها في الرابط). 

الأسئلة بشكل عام واضحة والوقت المعطى لحل الأسئلة ممتاز يعني عندكم ساعة ونص لـ ٧٥ سؤال بعدين فيه ١٥ دقيقة استراحة للي حاب ياخذها بعدها ساعة ونص للـ ٧٥ سؤال الثانية. الجزئية الأولى كانت أغلبها بكتيريا والثانية كانت منوعة لباقي الأقسام. 

حطو ببالكم إنه مافيه مواقف للأسف فراح تضطرون توقفون بالشارع برى وتمشون ليين المبنى. عشان كذا حاولو تجون قبل بوقت كافي يسمح لكم تدورون لكم موقف لأنه زحمة أو إذا تقدرون تخلون أحد يوصلكم أفضل. لا تنسون بطاقة الهوية ولا تجيبون شنط كبيرة لأن الخزائن حجمها صغير. والله يوفقكم وييسر أموركم ويفتحها عليكم ويبارك بسعيكم وجهودكم ويفرحكم بكل ما تطمحون له يارب.

 

النتايج أخذت تقريباً يومين وطلعت والحمدلله عديت من أول تجربة بنسبة حلوووة.