الثلاثاء، 14 يناير 2014

وش أسمك ؟







بسم الله الرحمن الرحيم 

كنت جالسة افكر يارب وش اكتب وش اكتب 
جت ببالي حاجه قلت ليه ما احكي عن بعض المواقف اللي صارت لي بسبب اسمي 

بالبداية اسمي هو مدائن صالح 
لما يسألني احد وش اسمك , واقوله مدائن صالح يعطيني هالنظرة  

المهم .. 
اول موقف ماكان معاي لاني كنت مره صغيرة , كان مع امي 
تقولي ذاك اليوم كنا بالمستشفى عشان عندك موعد , ولما نادو اسمك لفت علي اللي جنبي 
وقالت : وش اسمها ؟ 
تقول ماما قلت لها : مدائن 
قالت : لا ياشيخة حرام عليكم , حتعقدو البنت كذا غيروه <<< ابشرك ياللي قلتي كذا تراني مبسوطة فيه
 
قالت لها ماما : ان شاء الله ان كبرت وماعجبها هي بتغيره 
والله يافييه ناس ودك تجلدهم من لقافتهم  
.... 
عاد كبرت انا ودخلت المدرسة وما ادراك ما المدرسة 
 انا مو مضيق صدري الا ان اسمي ينحفظ بسرعة , يعني اول وحدة تذكرها الاستاذه انا 
وان بغت تناديني انا وقروبي تقول : يامدائن واللي معاها 
عاد تعرفون هذيك الخرشة اللي تجي بقلبك لما مدرسة تنادي اسمك  

جا ذاك اليوم وتأخرت لين تقريبا 2 ونص , احس المناوبة كان ودها تجلدني هههههههه المهم وانا انتظر السيارة تجي 
قالت لي تعالي اكتبي اسمك تأخير 
كنت برابع ابتدائي , رحت وكتبت اسمي الرباعي 
قالت لي تعالي تعالي 
قلت يالليل الحين بتهاوشني , رحت لها وقلت نعم 
قالت انتي اسمك صدق مدائن صالح ولا مركب ؟؟ 
عاد انا من هبالتي الزايدة قلت لها مركب (ماكنت ادري وش معناها) 
قالت اهاااا 
المهم يوم رحت للبيت واحكي لامي السالفة قالت يالخبلة اسمك مو مركب , المركب يعني يصير اسمك بلحالك 
مدائن صالح يعني يصير ابوك مو صالح 
بعد ما استوعبت السالفة كان ودي ارجع واقولها ترى كنت امزح مو مركب 
بس تخيلتها ماسكتني بزاوية وجالدتني , زود على اني كنت ماخرتها استظرف ؟ 

عاد من زود سماجتي انا بعد يوم كنت بالابتدائي , كان عندنا مدرسة اسمها الجوهرة الحسن , قد ايش كنت احبها 
يمكن لانها كنت معطتني وجه ومتحملة سماجتي  
كل ما اذكر وش كنت اسوي بحصتها احس ودي امسكني , واجلدني واجلدني واجلدني 
اول مره قالت لنا اين تقع مدائن صالح ؟ جيت عاد انا بكل ما احمله من سماجه وقلت : بالفصل 
معليش ادري حتى انا والله ودي اصفقني 
واذكر كنت محضرة الدرس وهي تشرح اشارك معاها قالت : ماشاء الله شكلك محضرة الدرس 
قلت : لا الاحداث صارت فيني كيف ما اذكر ؟؟ 
ااااااااااااااااه ودي اجلدني صدق  
أستاذة الجوهرة , شكرا لانك تحملتي سماجتي لو انا منك كان جلدتني 
 

الابتدائي والمتوسط كانو نفس البنات معاي يعني نظام التحويل التلقائي ومن هالسوالف 
المهم رحت للثانوي وتفرقو اغلب البنات 

اذكر وحدة بالثانوي الله يذكرها بالخير , تقول اول ماعرفت اسمك رجعت للبيت احكي لاهلي 
تخيلو فيه وحدة معانا بالفصل اسمها مدائن صالح 
جلست اضحك عليها يوم قالت لي 

دخلت الجامعة عاد , والجامعة مو زي الثانوي يعني اشكال والوان تمر عليك 
اول كلاس لي سألتني الدكتورة وش اسمك 
قلت لها مدائن صالح 
قالت لي نعم ؟؟؟ وش اسمك ؟ 
قلت يالليل ذي الحين بتنشب , قلت لها مدائن صالح ( كل البنات بالكلاس لفو يشوفون من هي صاحبة الاسم العجيب
 
حطت الاوراق وناظرتني قلت الحين تحسب اني استهبل -___- قالت فعلا اسمك كذا ؟ 
ابتسمت وقلت ايه 
قالت : واللهي عجيب ( طبعا مع هز الراس يمنة ويسرة
بغيت اقولها : شفتي ؟ ولله في خلقه شؤون بس اكلت تبن وسكت 

بعد ما طاحت الميانة شوي مع بنات الكلاس قالت لي وحدة , كنت جالسة احكي عنك قدام اهلي 
وانا منطلقة بالسالفة قلت اسمك قالو لحظة لحظة , صدق اسمها كذا ؟ قالت ايه , و ابوها صالح بعد
تقول احس كاني صافقتهم ههههههههه

ومره اذكر كنت رايحة انا وصاحبتي لبمنى الادارة عندنا شغلة هناك , المهم نظامهم لازم تكتبين اسمك عند الامن وتقولين لهم 
وش جاية تسوين 
كان فيه يمكن 5 من الامن جالسين على المكتب 
صاحبتي كتبت اسمها وبعدها كتبت اسمي وعطيتها بطاقتي الجامعية , يوم قرته قالت لي : اسمك مدائن صالح ؟ 
قلت لها : أيه 
اللي وراي ضحكت قالت امااااااااااا عاد تخيلي مدائن صالح 
لفيت عليها وابتسمت قلت صدق وشوله تتخيلين 
قالت : اما عاد ؟؟ صدق والله ؟ قلت ايه 
المهم سكتت هي تحسب اني زعلت ههههههههههه مادرت اني فاطسة ضحك عليها 

سالفة انه احد يقولي ( اسمك غريب , ابوك كيف فكر كذا ؟ , ليه سماك كذا , والله مميز  ) صار طبيعي جدا =)) 
عاد فيه اللي يجي يقول : وش تحسين فيه واسمك كذا؟ 
ابد احساس اي انسان عنده اسم =) 

واذكر مره كنت ابي ادق على ولد اختي , المهم بدلت بين اخر رقمين بالغلط , رد علي واحد نفس الصوت ونفس كل شيء مره 
قلت له هلا فلان 
قال لي مين ؟ 
قلت اشبك ماعرفتني ؟ انا مدائن 
قال : اقول بلا استهبال مين معاي ؟ 
يوم قال كذا قلت ايوووووه يابنت حطي رجلك الرقم خطا 

عاد هذا بعض مما حصل لي =)) 

وبالنهاية للي يناديني مداين , ترى اسمي مدائن فيه فرق يالطيب 
  


هناك 3 تعليقات:

  1. عااشت الاسمي ياا مدائن ^_^
    اسم مميز لدرجه لفتني اني اقرا الموضوع بس من العنوان :)
    ماشاء الله مدونتك مره كيوت حبيتها

    ردحذف
    الردود
    1. عاشت أيامك حبيبتي 3>
      الله يسعدك :"")

      حذف
  2. من يوم عرفتك اعشق اسمك طبعا كنت اعتقد انه اسم شائع بالسعودية اول مرة اعرف انه خاص فيكي و لا يُسمى به!
    كمان اول مرة اعرف انه مو مركب ما شاء الله انتي مدائن وابوكي صالح ♥~ الله يخلي لك الوالد ويحفظه
    من الي فهمته انو هو الي سماكي مدائن شكلو كان مستقصدها ههههههـ ~ لكنه توفق في اختيار الاسم لانك منجد انسانة سباشل احس ماحد يشبهك
    لذلك لا يليق بك اسم يشاركك فيه غيرك من البنات ~~ لازم شي خاص فيكي و فقط♥!
    يوم اختي كانت حامل براحيل سالتني اقترح عليها اسامي بنات وانا يعجبني اسمك بزااف بزاااف فاقترحتو طبعا عطتني ذيك النظرة -_- تستهبلي انتي ككك
    لاحقا اذا الله كتب لي و رزقني ببنية بسميها مدائن بعد إذنك ككك~ فتكوني انتي الاولى فالسعودية وبنتي الاولى فالجزاير ♥~~
    الله يرزقني زوج يوافق وهو مغمض عينه هههههه~
    وجميل لو كانت تحمل اسمك وكمان تحمل طموحك وحبك للحياة وانسانة مجتهدة وافاقها عالية وتحب الخير وتنفع مجتمعها ~
    أحبك صدقا واتمنالك كل الخير♥

    ردحذف