مواد مستوى ثالث (السنة الأولي - الترم الثاني) في جامعة الملك سعود

بسم الله الرحمن الرحيم ..

وخلصنا اول سنة في سعود ولله الحمد والمنه .. 
خلوني اكتب لكم انطباعي عن المواد طبعا حقت الترم الثاني بس لان الترم الاول ماكان فيه الا مادتين بس =) ومعروفة

نجي للمواد اللي اخذتها هالسمستر , 
اخذت ( كيمياء عامة "كيم101" – كيمياء حيوية "كيح101" – أحياء دقيقة "حدق 140" – ا
لاقتصاد الاسلامي "سلم 103" – أخلاقيات المهنة "سلم 107" )

نبدأ بالكيم ..

الدكتورة :  د.وعد الكيالي ..
ياربي هالدكتورة أتعب وانا اقول جميلة جميلة جميلة , يعني تشرح من قلب واي سؤال عندك ما تقصر وتسوي لنا مراجعة وتعطينا تمارين نحلها , يعني تعبت معانا مره

المادة : 
تنقسم ل7 فصول .. 
اول فصلين هم اللي يبيلهم شغل شوي يعني كثيرين وعله حبتين , لكن الباقي حليل .. المادة كثيرة ويبيلها شدة حيل وانتباه وتركيز .. يعني لا تتوقع \ تتوقعين ان حضورك بدون انتباه حينفع أبداً طريقة المذاكرة : كل فصل حاولي تكتبين القوانين حقته بورقة .. وقسمي كل فصل على يومين .. يعني خذيه براحتك وأقل من مهلك .. (هذا في الميدات ) وحاولي بعد كل محاضرة تراجعين القوانين اللي درستوها هذاك الوقت

الاختبارات : 
كانت موحدة بين الدكاترة .. كل سؤال عليه درجة واغلب اللخبطة تصير بالجزء النظري لأنه يلخم شوي :" بالنسبة للفاينل وهقونا حبتين مو كانو مخلين لنا الا يوم واحد بس نذاكره ..

العملي : 
درستني أ.سهام ..
 حليلة هي بس تعصب بسرعه :""( ولازم تكتبين معاها وهي تشرح لانك بتذاكرين من شرحها  .. بالنسبة للتجارب كانت تجاربه حلوه لكن الشيء الوحيد الي كان مأزمنا التقارير خاصة انه لازم نسلمها بنفس وقت المعمل او بكره على طول .. بس أحسن شيء ان اللي نختبره بالميد ما يدخل معانا بالفاينل =))

هنا حتحصلون ملف وورد فيه تمارين على المنهج كامل لكل الفصول وبعضها محلول ^^
http://www.4shared.com/get/i_-i2Pyjba/22-1435-36__solved_problems__1.html

وهنا  حطيت تدوينة كاملة عن المادة .. شوفوها فيها حاجات مهمة : 
http://madainsaleh2.blogspot.com/2015/06/general-chemistry-chem-101.html

نجي للكيح

الأستاذة : عاتكة الشمري .. 
عشان اكون صريحة انا تهزأت حبتين في اول محاضرة لي هههههههه لانها كانت بعد كل محاضرة تقوم بالاسماء وتسأل عن الدرس اللي فات .. ولما قلت لها اني ما حضرت قالت لي مو عذر واحس ضاق صدرك هذاك الوقت مره وجلست اتحلطم .. بس بعدين لا والله .. لانها كانت تسوي هالشي لنا احنا .. وهالاستاذة أقدرها بشكل جداً كبير .. حتى لو ماكانت تدري لكن اقولها لكم , غيرت فيني حاجات كثير للأفضل , وللأمانة ا.عاتكة من الاشخاص اللي لا تخلونها لو تقدرون تاخذون معاها اي مادة , كنت اقول ولا زلت اقول ا.عاتكة لو بيدي ودي انها تمسك رئاسة قسم =)) 
المادة : 
المنهج حوالي 12 او 14 فصل تقريبا يعني مو شوي وهي تسوي كذا عشان تغصبنا نذاكر وما يتراكم علينا

شرحها اتعب وانا اقول بططططل .. يعني تقطع نفسها عشان توصل لك المعلومة .. احمد ربي انها درستني .. ولما تسألينها ترجع لك السؤال على طريقة اسئلة صغيرة لين تخليك انتِ تجاوبين على نفسك =) "لو كان شي شارحته" .. تعلمت منها شغلة انه لما اقرأ معلومة او اعرفها ما اكتفي فيها بس .. زي مثلا يجي احد يقول انه الدواء الفلاني يخفض الضغط .. اوكي يخفضه بس وش طريقة عمله ؟؟" ووشي الاعراض الجانبية وهكذا

المادة : زي ما قلت لكم المادة مواضيعها كثيرة لكنها ممتعة مره مره مره بإستثناء جزئية الأيض =))) لانه كلها انزيمات وحفظ وجاية في الأخير بعد هدت الحيل =)) لكن بشكل عام المادة فيها معلومات مره مره مفيدة ولطيفة 

طريقة المذاكرة : 
زي ماقلت لكم يبيله حفظ أول بأول .. وحفظ من قلب مو مشي حالك خاصة لو اخذتي المادة عن أ.عاتكة =) اسئلتها دقيقة حبتين .. وما حينفعك ابدا لو حشرتي نفسك بيوم ولا يومين لانه مو يبيله مذاكرة وحدة .. مذاكرة + مراجعة

الأختبارات :
اول ميد لنا كان لخمة شوي كالعادة لانك ما تكونين عارفة طريقة الاستاذة بالاسئلة .. لكن يظل زي ما قلت انه اسئلتها دقيقة .. وتحب اسئلة الصح والخطأ (مع التصحيح  ) وتوزيع الدرجات برضو دقيق .. بالفاينل مرره ساعدتنا بتوزيع الدرجات وطريقتها .. يعني اغلب الاختبار كان اختياري ومن غير تصحيح الخطأ والمقالي كان حلو ولطيف

العملي :
 درستنا أ.غادة العمرو
 .. شرحها حلو بس متوصية بالعروض حقتها ههههههه خاصة النظريات العملية كنا نشيل همها مره وكانت كل معمل تعطينا كويز ولازم نذاكره :"" وقتها كنا نتحلطم على الكويزات لكن للأمانة ما ساعدنا الا الله ثم هي .. بالنسبة لشرح الاستاذة مو بطل , أبطل من البطل =) صدق والله كانت تقطع نفسها عشان نفهم :"  والتجارب كانت حلووة لكنها تاخذ وقت شوي .. و بالفاينل ساعدتنا كثير الله يسعدها 3>3> 

وهذا مخطط فيه تجارب المعمل والنتائج :
 (http://www.4shared.com/get/JKJ7f-Hoba/___.html

الحدق وما ادراك مالحدق

الدكتورة : أمل الموسى .. 
تساعد كثير بالفاينل , والاسئلة لكن نظامها  احنا نكتب المقرر اللي بنذاكره يعني تجلس تملينا في المحاضرة واحنا نكتب معاها .. (اول ما كتبت هالتدوينة ماكنت راضية عن الطريقة عشان اكون صريحة يعني ههههههه لكن حالياً اقول لدكتورة امل : " شكراً لك 3> ولو اني اعرف اني برجع اتحلطم  ثاني هههههه " ) . والواجب عبارة عن خريطة ذهنية كل 3 الى 4 بنات يمسكون درس واحسن مخطط منهم تعتمده نذاكره .. البنات يقولون ان المنهج المفروض انجليزي وهي عطتنا اياه عربي وانجليزي .. زي ما تقول تطبق علينا منهج مهارات البحث والتفكير =) بس كانت طريقتها غريبه وجديدة (مع الوقت بتتعودون عليها ترى لا تشيلون هم ^^ ) 

المادة : 
حليلة بس اكثر مادة شلت همها لانه كنت مشتتة مره .. يعني اذاكر من 3 اماكن (دفتري + عروضها + المخططات ) ..

الاختبارات : اغلبها مخططات و سؤال عصف ذهني جانا لخمنا =)) كانت حاطة لنا كلمات زي مثلا microbiology – algae .... وتقول ضعيها في جملة مفيدة .. ومره جابت لنا "اكتبي سؤال واجيبي عليه " يعني الاسئلة غير متوقعه =)) 
العملي : 
درستنا د. إيريم و أ.هويدا 
د.إيريم ماكان فيه شيء معين لطريقتها يعني اكثر شيء اللي كانت تشرح لنا وتركز علينا هي ا.هويدا 
بالنسبة لي انا احب ا.هويدا =)) يعني لما تشرح لك شي , انسي انك تنسينه =) ما يختلف 2 على شرحها ماشاء الله 
 بس لا تسمعون للي يخوفونكم منها , هي تعصب ايه لكن ما تعصب الا اذا سويتي شي يعصبها =) 
بقولكم اهم الاشياء اللي تنتبهون لها مع أ.هويدا : ( شعرك اربطيه - لابكوتك سكريه - جوالك حطيه بالشنطة - لا تدخلين اكل ولا شرب للمعمل - لا تاكلين علك - لا تسولفين - وقت الشرح ركزي معاها وجاوبي - ركزي برضو على خطوات العملي لانها غالباً ما تحب تعيد وتزيد بخطوات العملي ) 
وبس والله =)) 

الاقتصاد في العالم الإسلامي

الاستاذة : ندى المقبل .. 
اسلوبها كان عسسسسسل وشرحها عفوي مره مره .. يعني كنت انبسط بمحاضرتها كثير :"" وطيبة وكل شيء .. ما تطلعين من المحاضرة الا وانتي فاهمه منها كل شيء

المادة : كانت ممتعة خاصة للي مثلي ما يدبرون شي لا بالاقتصاد ولا بالسياسة =) يعني عرف اشياء كثيرة ما كنت اعرفها من قبل .. حتى مشروع المادة كان عبارة عن عرض او حلقات نقاش .. يعني سهالات

الاختبارات :
 كان كله اختياري .. وماكان صعب مره الحمدلله

أخلاقيات المهنة

الاستاذة : حصة الحمود .. 
 شرحها كان حلوو .. وكانت تختصر في الشرح يعني المادة سواليفها كثير .. بس بشرحها تعطيك الزبدة كلها =) لدرجة خلصنا بدري مرره قبل الخلق كلهم

المادة : 
جميلة جداً
 كمادة تثقيفية ما اختبر فيها هههههههههه لانه حكيها كثير والتعداد فيها متشابه شوي.. بس مره استفدت منها وعرفت حاجات كنت احسبها عادي وطلعت مو عادي =)))) زي مثلا ما يجوز اني استخدم الة طابعه في عملي عشان اطبع اوراق لاختي ولا لي خاصة مو للعمل .. وما يجوز استخدم وقت العمل واضيعه في حاجة مو للعمل .. يعني لما كنت بالتشغيل الطلابي كنت ما امسك جوالي واطقطق فيه ابداً لانه مو من حقي يعتبر الا في حاله قالو لي ما فيه شغل خلص .. يعني الحاجات اللي درستها في المادة على قد ما اقدر اطبقها ..خاصة سالفة التغشيش كنت مستهينة فيها لكن الحين لا ابداً ... المادة جداً جميلة وحتفيدك كثير

الاختبارات :
 نفس سلم 103 اختياري .. ولانه فيه تعداد كثير كان الميد دقيق شوي لكن في الفاينل كان مره اسهل

وبس هذي هي مواد هالترم ^^ عدت على خير بفضل ربي

وأي سؤال عن اي مادة او استاذة هذا الاسك تبعي

http://ask.fm/madaensaleh

او التويتر

@madaensaleh