الأربعاء، 8 أبريل 2015

التحويل الخارجي ( من جامعة لجامعة أخرى ) . .






بسم الله الرحمن الرحيم
في هالتدوينة بحاول ان شاء الله اني اتطرق لجميع جوانب التحويل ومتطلباته وكل شيء يتعلق فيه
قبل لا ابدا بحكي عن التحويل .. التحويل عندك اما يكون تحويل داخلي : ( تغيير التخصص في نفس الجامعة )
او تحويل خارجي : ( تغيير الجامعة )
.. .. .. ..
بداية بحكي عن سالفة تحويلي
حولت من جامعة الأميرة نورة لجامعة الملك سعود لأنهم قفلوا لنا مسارات القسم
(الاحياء كان يحتوي على 3 مسارات : عام – دقيق – جزيئي)
والتقفيل جا قبل اختيار المسار حقنا بترم, ما تتخيلون قد ايش التحطيم اللي جانا ووش كثر تعبنا عشان نخليهم
يرجعون لنا الاقسام لكن ( الخيرة فيما اختاره الله )
المهم فتح التحويل الخارجي على نهاية السنة تقريبا كنت متأزمة نفسيا لأقصى درجة , استخرت وقدمت اوراقي والحمدلله انقبلت بسعود
صح انه تحطمت بالبداية لانه فيه مادتين بالتحضيري ما عادلوها لي فاضطريت ادرس ترم كامل على مادتين وكلهم بس ساعتين !! وكنت اداوم 4 ايام بالاسبوع :"" بس صبرنا والحمدلله
اللي باقوله هنا أنا درست بنورة 3 سنوات لكن هذا ما يمنع إني اسلك طريق ثاني حتى لو كان طويل في سبيل تحقيق هدفي , عشان كذا لا يهمك كم درست ولا كم باقي المهم إنت وش تبي توصله ؟؟ وكلام الناس سكر أذانك عنه وامشي
وبالأخير اللي ربي يختاره هو الخير
.. .. .. ..
ندخل الحين بالحاجات المهمة عشان التحويل الخارجي والمتطلبات وكل شيء :
إذا تبي تقدم على تحويل خارجي لازم تعرف الجامعة اللي تبي تحول لها متى تفتح التحويل الخارجي عندها
مثلا أنت تدرس بجامعة الإمام وتبي تحول لجامعة الملك سعود لازم تعرف ( جامعة الملك سعود متى تفتح التحويل الخارجي تبعها ) وغالبا الجامعات تعلن قبل بفترة ويعطون وقت كافي للأوراق والإجراءات
- بعد ما تعرف التاريخ تروح تشوف المتطلبات الخاصة بالتقديم للتحويل في الجامعة اللي تبي تحول لها
مثلا متطلبات التحويل في جامعة الملك سعود كل مرة ينزلونها من جديد , اللي كانت على وقت تحويلي حتحصلونها هنا بالرابط :
طبعا انتبه انتبه انتبه .. تقديم الطلب أبدًا ما يعني قبولك عشان كذا لا تطلب إخلاء طرف أبداً (سحب ملف) إلا بعد ما يجيك إشعار القبول ويطلبون منك تسلمهم إخلاء الطرف
لأنه في حال طلبك لسحب الملف وما انقبلت في الجامعة المحول لها راح تضطر إنك تقدم كطالب جديد وبكذا ما حتتعادل لك ولا مادة وبتعيد من أول وجديد فإنتبه !!!
.. .. .. .. 
الحين بحاول اشرح لكم النقاط اللي تحتاج لتنبيه من المتطلبات اللي هم حاطينها
( غالبا تكون هالمتطلبات نفسها في كل الجامعات )
1- سجلك الأكاديمي أكد لهم إنهم يختمون على كل واحد فيهم , ونصيحة مني أطلب منهم 4 نسخ لأنك بحتحاجه بعدين

2- غالباً حيكون لك سبب مقنع أو مبرر مقنع للتحويل فأنت اكتب سبب تحويلك للجامعة

3- هذي النقطة أحب أنبه عليها , لازم اختبارك حق القياس ما يكون مر عليه أكثر من 5 سنوات لانه وقتها حتعتبر النتيجة ملغية ولازم تعيد الاختبار ثاني.

4- لا تقدم لهم أي ورقة أصل , كلها خليها صور طبق الأصل ماعدا السجل الأكاديمي طبعا لأنه ماراح يحق لك تطالب بالأوراق مرة ثانية.

5- هذي زي مانبهت فوق ’ لما يجيك إشعار القبول وقتها تقدر تروح تسحب ملفك بس انتبه تسحب ملفك وتجلس تتمطط لين يروح عليك الوقت , لأنه قبولك ما يعني إنهم راح يستنونك لين تجي , لهم وقت ويلغونه في حال ما سلمت الملفات المطلوبة.

6 - التعريف من جهة عمل ولي الأمر تكون فقط للطلاب اللي خارج مدينة الرياض
(الأوراق هذي تروح إنت بنفسك لعمادة القبول والتسجيل تقدمها لهم )
.. .. .. .. 
بتكلم الحين عن إخلاء الطرف لانه يمكن بعضكم ما يعرف وشو هو (نفس حالتي أول) =))

إخلاء الطرف هو :  ورقة لازم يكون فيها تقريبا 4 إلى 5 توقيعات وأختام ماني ذاكرة بالضبط ( هذا بالنسبة لجامعة الأميرة نورة على وقت تحويلي) , يكون كل ختم وتوقيع من جهة معينة في الجامعة , من الجهات اللي أذكرها كانت المكتبة المركزية ومكتبة كليتك وتوقيع من 3 أماكن ثانية بس ناسية وشي والله ’ المهم إنه هذا الإخلاء تاخذه من جامعتك بعد كذا تروح لحقين الملفات وتطلب سحب ملف , احتمال كبير يسألونك عن سبب سحبه. المهم راح ياخذون منك بطاقتك الجامعية ويوقعونك على ورقة إنك سحبت الملف بإرادتك وحاجات زي كذا وبعدين يعطونك ملفك
(هذا كله بعد القبول )
بعد كذا يا أما انك ترسل الأوراق المطلوبة بعد قبولك عن طريق البريد أو تروح تقدمها بنفسك لهم (عني رحت لهم بنفسي =)) لأنه ملف وكذا فأحس ما ارتحت إني أرسله لهم)
بكذا اجراءات تحويلك للجامعة تمت , في بداية السنة لازم تروح تستخرج بطاقة جامعية لك، وبطاقة صراف.
.. .. .. .. 
الحين بيبدأ مشوار ثاني .. :" اللي هو ( معادلة المواد اللي درستها )
من شروط معادلة المواد :
1- إنك تكون ناجح بالمادة ( مو مهم بأي تقدير لأنها بسجلك الأكاديمي الجديد حيحطونها فقط إنها مُجتازة ولا راح تدخل في معدلك أبدا) << فرصة كويسة للي مخبصين =))
2- أن يتطابق وصف المادة اللي درستها مع وصف المادة اللي تبي تعادلها , يعني شلون ؟ يعني يكون تقريبا 70%  من محتوى المادتين متطابق
3- أن يكون عدد الساعات المادة اللي درستها مساوٍ لعدد ساعات المادة اللي تبي تدرسها ( وما يمنع يكون أكثر لكن مو أقل، مثلاً لو درست أحياء عامة 3 ساعات , والمادة اللي تبي تعادلها هي عبارة عن أحياء عامة 4 ساعات ما راح يعادلونها بينما لو كان العكس عادي  )
.. .. .. .. 
نجي الحين لمتطلبات المعادلة :
1- سجلك الأكاديمي الأصل , (هذي النسخة الرابعة اللي قلتلك بتحتاجها) ويمكن تحتاج أكثر من نسخة للمعادلة (بوضح ليه بعد ما أخلص )
2- وصف المادة مختوم من القسم اللي تتبعه المادة ( من جامعتك السابقة)
3- ورقة المعادلة اللي تاخذها من شؤون الطلاب (شؤون الطالبات) "لكل قسم ورقة معادلة"

الحين خليني اوضح لكم طريقة المعادلة .. بضرب مثال فيني .. وحيكون فيه 4 حالات للمواد اللي تبي تعادلها
أنا طالبة أحياء تابعه لكلية العلوم ,
(الأول: مادة خارج الكلية ) درست مادة سلم 101 مثلاً , وأبي أعادلها , لازم اروح لكلية التربية قسم الثقافة الإسلامية وأرفع طلب من هناك , في حال تطابق وصف المادة وعدد الساعات راح أعطيهم 3 أشياء
1- سجلي الأكاديمي 2- ورقة المعادلة 3- وصف المقرر
ورقة المعادلة لازم يوقع عليها الشخص المسؤول عن المعادلة عشان يرفعونها لعمادة القبول والتسجيل عشان تنفذها على النظام وتنلغي من الخطة
(الثاني : مادة داخل الكلية ولكن تخصص مختلف ) زي ما ذكرت أنا طالبة أحياء ولكني درست مادة كيمياء عامة مثلاً , وأبي أعادلها , لازم أروح لقسم الكيمياء العامة
 هنا لأن القسم في نفس كليتي فراح أرفع طلب المعادلة لكل المواد اللي داخل الكلية , يعني قسم الكيمياء راح أوريهم سجلي الاكاديمي ( عشان يتأكدون من اجتيازي للمادة ) + وصف المقرر يطابقونه بعدين راح يوقعون لي على ورقة المعادلة ويرجعون لي أوراقي ( وهذا حيصير بكل المواد اللي داخل الكلية زي ماقلت )
(الثالث: مادة داخل الكلية ونفس التخصص ولكن مسار مختلف ) : نفس الشي أنا طالبة أحياء – مسار أحياء دقيقة – ولكني درست مادة من مسار الحيوان العام , مثلا مادة علم الحيوان , لازم أروح لقسم الحيوان وأقدم طلب معادلة من هناك
الإجراءات راح تكون مطابقة تماما لإجراءات معادلة الحالة الثانية
(الرابع : مادة داخل الكلية ونفس التخصص ونفس المسار ) مثلا درست مادة من نفس مساري – الاحياء الدقيقة- ولنفرض إنها نبات , هالمرة أروح لقسم مساري وأقدم طلب هناك وبرضو نفس إجراءات الحالة الثانية والثالثة.

الحين الحمدلله خلصت معاك أوراق المعادلات موقعة من كل الاقسام بالموافقة , وين تروح ؟
تروح لشؤون الطلاب\ الطالبات , وهم عليهم إنهم يقدمون خطاب لعمادة القبول والتسجيل مرفق معاها ( اوراق المعادلات حقتك + سجلك الأكاديمي )
تسلمهم اوراقك وبعدها تتابع البوابة الالكترونية حقتك , المواد اللي عادلوها لك راح تظهر لك في سجلك الاكاديمي ولكن زي ما ذكرت بدون اي تقدير ولا تحسب في معدلك
 .. .. .. 
( طبعا الله يعينك عالنفسيات اللي بتقابلها وعلى بعض الاشخاص اللي بيعقدون لك حاجات سهلة , وبتحصل ناس ودك تحب روسهم من تعاملهم الزين , إنت بس اصبر اصبر )

صح وفيه حاجة.. ترى مو لازم تقدمهم كلهم مع بعض يعني إذا فيه ناس عقدوها عليك , وتحس إنهم بيحوسونك حوس
قدم أوراقك وتفرغ لهم بعدين , وارجع قدم ثاني =)))
.. .. .. .. 
في آخر شي بقول كذا غلط طحت فيه وكم نصيحة لكم :

1- لا تستحي من السؤال , عادي صير إنسان بثر أهم شي لا تكتفي بإجابة شخص واحد , لأنه فيه أشخاص بس يبون يفتكون وماعندهم لا ذمة ولاضمير , فإنت امشي واسأل واقرأ وابحث واحفر الأرض حفر
2- لازم تعرف إنه محد بيفيدك كثر نفسك عشان كذا لا تعتمد لا على فلان ولا على علان, خلص شغلك بنفسك
3- تحويلك لجامعة أخرى ما يلزمك تحول لنفس تخصصك 
4- لو كان باقي لك مواد بالتحضيري لا تغلط نفس غلطتي وتاخذهم بلحالهم خاصة لو كانت مادتين , لأنه تقدر تاخذ من مواد التخصص حقك , شلون و‘نت بالتحضيري ؟ إنت أساسا انقبلت بالتخصص عشان كذا ما تعتبر تحضيري , بالنسبة لي ضيعت ترم كامل عالفاضي بس لازم الواحد يغلط عشان يتعلم 
5- بتقابل ناس تحسسك إنها تتفضل عليك باللي إنت جالس تسويه , ماعليك منهم اصبر أنت لين تخلص أمورك
6- اخيراً لا تقول مستحيل أدخل إلا بواسطة ولا تعتمد أبد على درجاتك وجهدك , انتبه :"" اعتمد أولا وأخيرا على الله سبحانه وتعالى

بكذا أكون خلصت ^^ لو فيه أي سؤال ارحب فيه على التويتر
@madaensaleh
أو على الآسك :

ask.fm/madaensaleh




هناك 6 تعليقات:

  1. السلام عليكم لو سمحت ينفع اذا حولت لسعود لتخصص غير اللي انا ادرس فيه دحين

    ردحذف
    الردود
    1. وعليكم السلام والرحمة
      إيه ينفع

      حذف
    2. التحويل الخارجي لتخصص ادبي ياخذون اي درجة الثانوي ولا الجامعة ؟

      حذف
  2. وكيف لو بحول لتخخص ثاني اسوي بنفس الطريقه؟
    مثلا لو انا ادارة وابي احول صحي اقدر؟

    ردحذف
  3. السلام عليكم انا في جامعة الملك سعود وابغى احول للاميرة نورة هل اقدر؟ لان كد سمعت ان نورة فقط تقبل الي جايين من برا الرياض

    ردحذف
  4. ايش الاسباب اللي ممكن اكتبها؟لأن انا ابغى احول من نورة لأني مو متكيفه فيها ،اخاف يحسونه سبب سخيف ويتكنسل الموضوع بسببه

    ردحذف